الەمدىك ەتنوسپورت ويىندارىنا قانداي سپورت تۇرلەرى كىرەدى
«وسى جىلدىڭ 13-14 - تامىزى كۇندەرى تۇركيانىڭ ىستانبۇل قالاسىندا يۋنەسكو- نىڭ ەتنوسپورت جونىندەگى كەشەندى IV كەڭەسى ءوتتى. يۋنەسكو- نىڭ تۇراقتى وكىلدەرى، 40-تان استام مەملەكەتتتىڭ سپورت مينيسترلەرى، دەپۋتاتتارى مەن لاۋازىمدى تۇلعالارى جانە حالىقارالىق سپورت فەدەراتسياسىنىڭ باسشىلارى باس قوسقان كەڭەستە 2021 -جىلى استانادا تۇڭعىش الەمدىك ەتنوسپورت ويىندارىن وتكىزۋ شەشىمى جاريالاندى. ءسويتىپ ءبىز تاۋەلسىزدىگىمىزدىڭ 30 جىلدىعى قارساڭىندا استانادا جەر جاھاننىڭ تاڭداۋلى ۇلتتىق ويىندارىننان وتەتىن سپورت باسەكەلەرىن تاماشالايتىن بولادى»، - دەدى بەكبولات تىلەۋحان و ك ق- دە وتكەن باسپا ءسوز ءماسليحاتىندا.
ب. تىلەۋحاننىڭ ايتۋىنشا، ەتنوسپورت ويىندارىن وليمپيادا ويىندارىمەن جانە ەنتوفەستيۆالدەرمەن سالىستىرۋعا بولمايدى.
سونىمەن قاتار، ول ايتۋلى باسەكەنى وتكىزۋگە تالاسۋشى مەملەكەتتەردىڭ از بولماعانىن جانە وتكىزۋگە ۇمىتكەر ەلدەردىڭ سپورتتىق جەتىستىگى عانا ەمەس، سول سياقتى ەكونوميكالىق تۇراقتى دامۋىنا دا ءمان بەرىلگەنىن ايتتى.
الەمدىك ەتنوسپورت ويىندارىندا قانداي سپورت تۇرلەرى بولادى دەگەن سۇراققا ب. تىلەۋحان قازاق كۇرەسى، كوكپار، تەڭگە ءىلۋ، اۋدارىسپاق جانە توعىزقۇمالاق ۇلتتىق ويىندارىن ۇسىنۋدى كوزدەپ وتىرمىز دەپ جاۋاپ بەردى.
ەسكە سالا كەتەيىك، بۇعان دەيىن يۋنەسكو- نىڭ باستاماسىمەن 2021 -جىلى 1- الەمدىك ەتنوسپورت ويىندارى قازاقستاندا ۇيىمداستىرىلاتىندىعى تۋرالى حابارلاعان بولاتىنبىز.
اۆتور: داۋلەت ىزتىلەۋ
