16:51, 29 - تامىز 2018 | GMT +5
الەمنىڭ ەكى دۇركىن چەمپيونى نازىم قىزايباي ازيادادا جۇلدەسىز قالدى
استانا. قازاقپارات - جاكارتادا ءوتىپ جاتقان ازيا ويىندارىندا بوكستان الەمنىڭ ەكى دۇركىن چەمپيونى نازىم قىزايباي دا جارىستى جۇلدەسىز اياقتادى، دەپ حابارلايدى قازاقپارات ءتىلشىسى.
ق ر ۇلتتىق وليمپيادا كوميتەتى باسپا ءسوز قىزمەتىنىڭ حابارلاۋىنشا، بۇگىن شيرەك فينال باسەكەسىندە ايەلدەر اراسىندا 51 كەلىدە ەل نامىسىن قورعاعان نازىم قىزايباي تايپەيلىك سپورتشىدان جەڭىلىپ، ازيا ويىندارىن اياقتادى.
سونىمەن قاتار، بۇگىن ەرلەر اراسىندا 75 كەلىگە دەيىنگى سالماقتا جۇدىرىقتاساتىن ءابىلحان امانقۇل ازيا ويىندارىنىڭ جارتىلاي فينالىنا ءوتتى. ءابىلحان تايپەيلىك بوكسشىمەن كەزدەسىپ، قارسىلاسىن ەكى رەت ەسەڭگىرەتتى.
جەكپە- جەك ناتيجەسى بويىنشا ايقىن باسىمدىقپەن جەڭىسكە جەتكەن ءابىلحان ەندى ازيا ويىندارىنىڭ جارتىلاي فينالىندا جۇدىرىقتاسادى. ءابىلحاننىڭ كەلەسى قارسىلاسى - ءۇندىستاندىق ۆيكاس كريشان.
ەستەرىڭىزگە سالا كەتەيىك، وسىعان دەيىن جارىس جولىندا ءۇش بوكسشى قالعانىن جاريالاعان بولاتىنبىز.
اۆتور: كۇنسۇلتان وتارباي
