تالدىقورعاندا ءتارتىپ ساقشىلارى ۇزدىك مەرگەندەردى انىقتادى

تالدىقورعان. قازاقپارات - الماتى وبلىستىق ىشكى ىستەر دەپارتامەنتىنىڭ ۇيىمداستىرۋىمەن «جاۋىنگەرلىك قارۋدان نىسانا كوزدەۋ» اتتى جارىس ءوز مارەسىنە جەتتى.

اتالعان دوداعا جيىرمادان استام كوماندا قاتىستى، دەپ حابارلايدى قازاقپارات ءتىلشىسى.

باسپا ءسوز قىزمەتىنىڭ اقپاراتىنا سايكەس، وبلىستىق پوليتسيا دەپارتامەنتىنىڭ، قالالىق جانە اۋداندىق ىشكى ىستەر بولىنىستەرىنىڭ، ىشكى اسكەر مەن مەملەكەتتىك كۇزەت قىزمەتى باسقارماسىنىڭ قىزمەتكەرلەرى ءوزارا مەرگەندەردى انىقتاعان بايقاۋ بىرنەشە نوميناتسيا بويىنشا وتكىزىلدى.

«مەرگەندەر جارىسى بىزدە جىل سايىن ۇيىمداستىرىلادى. ءار توپ قۇرامىنداعى ەكى ەر ادام مەن ءبىر ايەل ادام ەرەجە بويىنشا پوليتسەيلەردىڭ تابەلدىك قارۋى ماكاروۆ تاپانشاسىنان جانە كالاشنيكوۆ اۆتوماتىنان سايىسقا ءتۇستى. بۇگىنگى جارىستا ماكاروۆ تاپانشاسىنان نىسانا كوزدەۋدە ەرلەر اراسىندا پوليتسيا مايورى راۋان ابباسوۆ ۇزدىك ناتيجە كورسەتسە، كالاشنيكوۆ اۆتوماتىنان اتۋدا ىشكى اسكەر قىزمەتشىسى مايور نۇرلان سۇگىراليەۆكە تەڭ كەلەتىن مەرگەن بولمادى. ايەلدەر اراسىندا تاپانشامەن نىسانا كوزدەۋدە دينارا باۋبەكوۆا مەن مەرۋەرت مارياكوۆا قاتىسۋشىلاردان وزىپ شىقتى. الماتى وبلىسى مەملەكەتتىك كۇزەت قىزمەتى باسقارماسىنىڭ توبى جالپى ەسەپتە جوعارى ناتيجە كورسەتىپ، ۇزدىك توپ اتاندى»، - دەدى وبلىستىق ءى ءى د ارنايى دايارلىق باسقارماسىنىڭ باستىعى ماديار قۇسايىنوۆ اتاپ ءوتتى.

ۇيىمداستىرۋشىلاردىڭ حابارلاۋىنشا، پوليتسيا قىزمەتكەرلەرىنىڭ تابەلدىك قارۋمەن اتۋ، نىساناعا ءدال تيگىزۋ داعدىلارىن شىڭداۋ - ارنايى دايارلىق باعىتتارىنىڭ ءبىرى. وبلىس دەڭگەيىندەگى جارىستا ۇزدىك ناتيجە كورسەتكەن مەرگەندەر رەسپۋبليكالىق بايقاۋدا جەتىسۋ ءوڭىرىنىڭ نامىسىن قورعايتىن بولادى.