الماتى وبلىسىندا امبەباپ دەنە شىنىقتىرۋ كەشەنى اشىلدى

تالدىقورعان. قازاقپارات - الاكول اۋدانى ءۇشارال قالاسىندا مەملەكەتتىك-جەكەمەنشىك ارىپتەستىك اياسىندا سالىنعان جەكپە-جەك جانە كۇش قولدانىلاتىن سپورت تۇرلەرىنە ارنالعان «تارلان» اتتى امبەباپ دەنە شىنىقتىرۋ-ساۋىقتىرۋ كەشەنى اشىلدى، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.

جاڭا سپورت كەشەنىندە كەلۋشىلەردىڭ سپورتتىڭ بوكس، كۇرەس، دزيۋدو، تاەكۆوندو، اۋىر اتلەتيكا جانە فۋتبول تۇرلەرىمەن اينالىسۋعا بارلىق مۇمكىندىكتەر قاراستىرىلعان. جەرگىلىكتى تۇرعىنداردىڭ قۋانىشىن بولىسۋگە الماتى وبلىسىنىڭ اكىمى اماندىق باتالوۆ ارنايى كەلدى.

«مەملەكەت باسشىسىنىڭ تاپسىرمالارىن ورىنداۋ ماقساتىندا الماتى وبلىسىندا سپورتتى دامىتۋ مەن حالىقتى سالاۋاتتى ءومىر سالتىن ۇستانۋعا تارتۋ باعىتىندا بەلسەندى جۇمىستار جۇرگىزىلۋدە. بۇگىنگى كۇنى وڭىردە 3 مىڭنان استام سپورتپەن شۇعىلدانۋ ورىندارى مەن 37 سپورت مەكتەبى قىزمەت كورسەتۋدە. جالپى وبلىس بويىنشا 500 مىڭنان استام ادام سپورتپەن تۇراقتى تۇردە اينالىسادى. سپورتتىڭ گاندبول، كوگالداعى حوككەي، رەگبي، ات جانە ۇلتتىق سپورت تۇرلەرى بويىنشا جاتتىقتىراتىن بالالار مەن جاسوسپىرىمدەرگە ارنالعان سپورت مەكتەپتەرى دە جۇمىس ىستەپ تۇر. بۇقارالىق سپورتتى دامىتۋدى جالعاستىرا وتىرىپ، ءبىز، وبلىستىڭ بارلىق اۋداندارى مەن قالالارىندا دەنە شىنىقتىرۋ - ساۋىقتىرۋ كەشەندەرىن (د س ك) سالۋدى جوسپارلاپ قويدىق. بۇل يگى ىستە بىزگە مەملەكەتتىك-جەكەمەنشىك ارىپتەستىك ۇلكەن قولداۋ كورسەتۋدە. بۇگىن ءبارىمىز بىرىگىپ، وسىنداي د س ك- نىڭ ءبىرىن اشقالى تۇرمىز. وسى د س ك- دان اتى الەمگە تانىلاتىن جاڭا چەمپيونداردىڭ جاتتىعىپ شىعارىنا سەنىم بىلدىرەمىن. بارشاڭىزدى وسىناۋ ايتۋلى شارامەن شىن جۇرەكتەن قۇتتىقتايمىن»، - دەدى ا. باتالوۆ.

وسىدان كەيىن جينالعان كوپشىلىكتى بوكستان وليمپيادا چەمپيونى باحتيار ارتايەۆ قۇتتىقتادى.

دەنە شىنىقتىرۋ-ساۋىقتىرۋ كەشەنىنىڭ قۇرىلىسىنا 550 ميلليون تەڭگە بولىنگەن. قۇرىلىس جۇمىستارى وتكەن جىلدىڭ ساۋىرىندە باستالعان بولاتىن. قۇرىلىستى جۇرگىزگەن - «BB Company» ج ش س. عيماراتتىڭ اۋدانى 1100 شارشى مەتر، ال كەشەننىڭ جالپى اۋدانى - 6000 شارشى مەتر. ءتۇرلى سپورتقا بەيىمدەلگەن زالداردان بولەك، جاتتىقتىرۋشىلار مەن دارىگەرلەر بولمەسى، كيىم اۋىستىرۋ جانە جۋىنۋ بولمەلەرى قاراستىرىلعان. فۋتبول الاڭى مەن «Street workout» قالاشىعى كەشەنگە جاپسارلاسا ورنالاسقان.

ايتا كەتۋ كەرەك، قازىرگى تاڭدا الماتى وبلىسىنىڭ جامبىل، ەڭبەكشىقازاق، كەربۇلاق جانە الاكول اۋداندارىندا جالپى سانى 4 دەنە شىنىقتىرۋ-ساۋىقتىرۋ كەشەنى سالىنعان. سونداي-اق قاراساي اۋدانىنداعى قاسكەلەڭ قالاسى مەن شامالعان اۋىلىندا، تالعار اۋدانىنىڭ تالعار قالاسىندا، رايىمبەك اۋدانىنىڭ كەگەن اۋىلىندا، اقسۋ اۋدانىنىڭ جانسۇگىروۆ كەنتىندە د س ك قۇرىلىسى ءجۇرىپ جاتىر.