ەلوردالىق شەنەۋنىكتەردىڭ قايسىسى قىزمەتتىك تاكسيدى شاقىرتا الادى؟

استانا. قازاقپارات - ەلوردا اكىمدىگى شەنەۋنىكتەرىنىڭ قايسىسى قىزمەتتىك تاكسيدى شاقىرۋ قۇقىعىنا يە بولادى؟ بۇل سۇراققا استانا قالالىق ورتانى رەگەنەراتسيالاۋ باسقارماسىنىڭ باسشىسى عاني يسقاليەۆ ەلوردا اكىمدىگىنىڭ باسپا ءسوز ورتالىعىندا وتكەن بريفينگتە جاۋاپ بەردى، دەپ حابارلايدى قازاقپارات ءتىلشىسى.

«تاكسيدى باسشىلار مەن ونىڭ ورىنباسارلارى عانا ەمەس، ساپار جۇمىس بابىمەن بولعان جاعدايدا ليميت اياسىندا كولىك شاقىرۋعا قۇقىلى كەز كەلگەن مەملەكەتتىك ورگان قىزمەتكەرى شاقىرا الادى. ونىڭ ءبارى تىركەلەدى: كىمنىڭ قوڭىراۋ شالعانى، كىمنىڭ تاپسىرىس بەرگەنى، قايدا بەرگەنى تىركەلىپ وتىرادى. ايدىڭ سوڭىندا مونيتورينگ جۇرىگىزىلەدى. اي سايىن كومپانيا، ءبىزدىڭ سەرىكتەستەر قىزمەتكەرلەردىڭ قايدا بارعانىن كورسەتىپ وتىرادى»، - دەيدى عاني يسقاليەۆ.

ونىڭ ايتۋىنشا، ساپارلاردىڭ مونيتورينگى كۇن سايىن جۇرگىزىلەدى.

«ءبىز كۇن سايىن مونيتورينگ جۇرگىزەمىز - كىمنىڭ قايدا بارعانى، ءدال سول كەزدە جۇمىس بابىمەن شىققانى- شىقپاعانى قارالادى. ليميتتەرىنىڭ ءبىتىپ كەلە جاتقانىن باسقارمالارعا الدىن الا حابارلاپ وتىرامىز. ەگەر ليميت ءبىتىپ قالعان جاعدايدا - امال جوق، جاياۋ جۇرۋگە تۋرا كەلەدى»، - دەيدى عاني يسقاليەۆ.

باسقارما باسشىسى، سونىمەن بىرگە، قاراجاتتى ۇنەمدەۋ تۇرعىسىندا ءسوز قوزعادى.

«وتكەن جىلعى شىعىنداردى ەسەپكە الا وتىرىپ، ءبىز جىلىنا 120-150 ميلليون تەڭگەنى ۇنەمدەيتىن بولامىز. سوندا 5 جىلدا 600 ميلليون تەڭگەنى ۇنەمدەيمىز. ول قاراجات باسقا الەۋمەتتىك ماقساتتارعا جۇمىلدىرىلادى. مەكتەپتەگى تاماقتاندىرۋ، مۇمكىندىگى شەكتەۋلى جانداردىڭ قالا ىشىندە جەڭىلدىكپەن ءجۇرۋى سەكىلدى قاجەتتىلىگىمىز وتە كوپ. ولاردىڭ بارىنە قاراجات كەرەك»، - دەيدى عاني يسقاليەۆ.

ەسكە سالا كەتسەك، بۇعان دەيىن استانالىق اكىمدىكتىڭ 2018-جىلدان باستاپ تاكسي قولدانۋ بويىنشا پيلوتتىق جوباعا اۋىساتىنى حابارلانعان ەدى. وسى جىلدىڭ قىركۇيەك ايىندا قالا اكىمدىگى قىزمەتتىك كولىكتەردەن باس تارتقالى وتىر.