قازاقتىڭ ەجەلگى مەرەكەسى يۋنەسكو تىزىمىنە ەنگىزىلۋى مۇمكىن

بىشكەك. قازاقپارات - يۋنەسكو- نىڭ ۇكىمەتارالىق كوميتەتى جىلقىشىلاردىڭ ءداستۇرلى كوكتەمگى مەرەكەسىن ادامزاتتىڭ ماتەريالدىق ەمەس مادەني مۇرالارى تىزىمىنە ەنگىزۋ ماسەلەسىن قارايدى، دەپ حابارلايدى قازاقپارات ءتىلشىسى.

 بۇل تۋرالى التاي تىلدەرىندە سويلەيتىن تۋىسقان حالىقتاردىڭ تاريحى مەن مادەنيەت زەرتتەۋشى عالىمداردىڭ بىشكەكتە ءوتىپ جاتقان حالىقارالىق كونفەرەنتسياسىندا بەلگىلى قازاقستاندىق عالىم ەمما ۋسمانوۆا ءمالىم ەتتى.

ونىڭ ايتۋىنشا، اتالعان ماسەلە 2018 -جىلدىڭ قاراشا ايىنا جوسپارلانعان.

ە. ۋسمانوۆا كونفەرەنسيانىڭ حالىق ويىندارىنا ارنالعان سەكسيالارىنىڭ بىرىندە قاراعاندى وبلىسىنىڭ ۇلىتاۋ اۋدانىنداعى تەرىساققان كەنتىندە قازاق جىلقىشىلارى جىل سايىن 1 - مامىردا تويلايتىن تاماشا ءداستۇرلى مەرەكەسى تۋرالى بايانداما جاسادى. مەيرام «بيە بايلاۋ»، «ايعىر قوسۋ» جانە قىمىز ءپىسۋ سياقتى ءۇش بولىكتەن تۇرادى.

بۇل مىڭداعان جىلداردان بەرى تويلاناتىن ەجەلگى مەرەكە. ەۋرازيا قۇرلىعىندا ول تەك تەرىساققان اۋىلىندا عانا ساقتالعان. سوندىقتان كونفەرەنسيانىڭ، ءتىپتى كەيبىر قازاقستاندىق قاتىسۋشىلارى دا بۇل تۋرالى العاش رەت ەستىدى. عالىمنىڭ بايانداماسى شەتەلدىك عالىمداردىڭ قىزۋ تالقىسىنا ۇلاستى.

«قازاقتاردىڭ ءداستۇرلى كوكتەمگى مەرەكەسى قازىرگى مادەنيەتتەگى بىرەگەي فەنومەن بولىپ تابىلادى. ونى ادامزاتتىڭ ماتەريالدىق ەمەس مادەني مۇرالارى تىزىمىنە ەنگىزۋ ۇسىنىلعان. قاراشادا يۋنەسكو وسى ماسەلەنى تالقىلايدى»، - دەيدى عالىم.

كونفەرەنسياعا 14 ەلدەن جينالعان 160 عالىم قاتىسىپ جاتىر.