قىزمەتتىك كولىكتەن تاكسيگە اۋىساتىن اسەت يسەكەشيەۆتىڭ جۇرگىزۋشىسى كىم بولادى
بۇل سۇراققا ەلوردا اكىمدىگىنىڭ باسپا ءسوز ورتالىعىندا وتكەن بريفينگتە استانا قالالىق ورتانى رەگەنەراتسيالاۋ باسقارماسىنىڭ باسشىسى عاني يسقاليەۆ جاۋاپ بەردى، دەپ حابارلايدى قازاقپارات ءتىلشىسى.
«اكىم جالعا الۋ قۇقىعى بويىنشا تاكسي قىزمەتىن پايدالاناتىن بولادى. بۇل - بەلگىلى ءبىر كولىك نەمەسە جۇرگىزۋشى. تاكسوپارك ول كولىكتى نەمەسە جۇرگىزۋشىنى اۋىستىرا الادى. بالكىم، باسقالاردان گورى، اكىمدى الىپ جۇرەتىن جۇرگىزۋشىگە قويىلاتىن تالاپ قاتاڭ بولۋى مۇمكىن. قاۋىپسىزدىك تۋرالى سۇرايتىن بولساڭىزدار، اكىمنىڭ جۇرگىزۋشىسىنە بەرىلەتىن ارنايى ارتىقشىلىقتار نەمەسە اتتەستاتتاۋ، تەستىلەۋ جوق. ول دا - قاراپايىم تاكسي جۇرگىزۋشىسى. اكىم دەمالىپ جاتقاندا ول جۇرگىزۋشى باسقا دا تاكسيستەر سەكىلدى باسقا ۇيىمدار ءۇشىن جۇمىسىن جالعاستىرا بەرەدى»، - دەدى عاني يسقاليەۆ.
ەسكە سالا كەتسەك، بۇعان دەيىن استانالىق اكىمدىكتىڭ 2018 -جىلدان باستاپ، تاكسي قولدانۋ بويىنشا پيلوتتىق جوباعا اۋىساتىنى حابارلانعان ەدى. وسى جىلدىڭ قىركۇيەك ايىندا قالا اكىمدىگى قىزمەتتىك كولىكتەردەن باس تارتقالى وتىر.
اۆتور: ايان بەكەن ۇلى
