ەسەن ەلەۋكەن جاڭا قىزمەتكە تاعايىندالدى

استانا. قازاقپارات - قازاقستان ك ت ا (كوڭىلدى تاپقىرلار الاڭى) وداعىنىڭ ءتوراعاسى ەسەن ەلەۋكەن 1 -قىركۇيەكتەن باستاپ جۇمىسىن باستايتىن ويىن- ساۋىقتىق«Tamasha tv»  تەلەارناسىنىڭ باسشىلىعىنا كەلدى، دەپ حابارلايدى قازاقپارات ءتىلشىسى.

«Tamasha tv» تەلەارناسى «قازاقستان» تەلەراديوكورپوراتسياسىنا قاراستى ءتورتىنشى تەلەارنا بولىپ وتىر.

 «2018 -جىلدىڭ 1 - قىركۇيەگىنەن باستاپ ويىن- ساۋىقتىق «Tamasha tv» تەلەارناسى ەفيرگە جول تارتادى. جاڭا تەلەارنا OtauTV جانە iDTV پاكەتتەرىندە HD فورماتىندا قولجەتىمدى بولادى. سونداي-اق، الداعى ۋاقىتتا باسقا دا كابەلدىك وپەراتورلاردا SD فورماتتا تاراتىلاتىن بولادى. بۇگىنگى كۇنى سپۋتنيكتىك وتاۋ ت ۆ  وپەراتورىنىڭ اۋديتورياسى شامامەن 900 مىڭعا جۋىق بولسا، ال ID TV- دى 413406-عا جۋىق ابونەنت قولدانادى.  «Tamasha tv» تەلەارناسىنىڭ ەفيرى «قازاقستان» تەلەراديوكورپوراتسياسىنىڭ ىشكى تەلەونىمىمەن تولىقتىرىلتىن بولادى»، - دەلىنگەن تەلەراديوكورپوراتسيانىڭ حابارلاماسىندا.

جاڭا تەلەارنا «ءازىل الەمى»، «جايدارمان»، «حاحا- شوۋ»، «ءازىلمان»، «كوڭىلدى تاپقىرلار الاڭى»، « قىزىق ەكەن»، كومەديالىق تەلەحيكايالار جانە تاعى باسقا قىزىقتى جوبالاردى ۇسىنباق. سونداي-اق، ول تەلەراديوكورپوراتسيا مۇراعاتىندا جىلدار بويى ساقتالعان، كەزىندە كورەرمەننىڭ كوڭىلىنەن شىققان تانىمال ويىن-ساۋىقتىق باعدارلامالار ەفيرگە قايتادان ورالاتىن بولادى.

«Tamasha tv» تەلەارناسىنىڭ ورتاشا تاۋلىكتىك حابار تاراتۋ ۋاقىتى 22 ساعاتتى قۇرايتىن بولادى.

اۆتور: ايان بەكەن ۇلى