ماككەيننىڭ قازاسىنا بايلانىستى اق ءۇي ۇستىندەگى تۋ تومەن ءتۇسىرىلدى
«دجون ماككەينمەن ساياساتقا قاتىستى ۇستانىمىمىز الشاق بولسا دا، ونى ەلىمىزگە جاساعان قىزمەتى ءۇشىن قۇرمەتتەيمىن. ونىڭ قۇرمەتىنە مەملەكەتتىك تۋدى ونىڭ جەرلەۋى بولاتىن كۇنگە دەيىن تومەن تۇسىرۋگە وكىم ەتتىم» دەلىنگەن ترامپتىڭ مالىمدەمەسىندە. دجون ماككەين قايتىس بولعان سوڭ، وتكەن دەمالىس كۇندەرى اق ءۇي ۇستىندەگى تۋ تومەن ءتۇسىرىلىپ، كەشە قايتا كوتەرىلگەن ەدى. ءبىراق، ترامپتىڭ تاپسىرماسىنان سوڭ تۋ قايتا ءتۇسىرىلدى.
سەناتور دجون ماككەينمەن قوشتاسۋ وسى اپتادا ا ق ش- تىڭ ءۇش قالاسىندا وتەدى. جەرلەۋ راسىمىنە دەيىن ماككەيننىڭ دەنەسى ءوزى تۋعان اريزونا شتاتىندا، ودان سوڭ ۆاشينگتونداعى كاپيتولييدىڭ اقش پارلامەنتىنىڭ «جۇرەگى» سانالاتىن روتوندا كۇمبەزىندە ساقتالادى. امەريكا تاريحىندا مۇنداي قۇرمەت تەك 30 ادامعا بۇيىرعان. ماككەين مۇنداي قۇرمەتكە يە بولعان 13-سەناتور بولماق.
1 - قىركۇيەكتە ۆاشينگتوندا كاپيتولييداعى ەسكە الۋ جيىنى وتەدى. 2 - قىركۇيەكتە ماككەيندى انناپوليس قالاسىنداعى (مەريلەند شتاتى) ءوزى وقىعان اسكەري- تەڭىز كۇشتەرى اكادەمياسىنىڭ زيراتىنا جەرلەيدى.
الەم ەلدەرىنىڭ باسشىلارى، ماككەيننىڭ كونگرەسستەگى ارىپتەستەرى - دەموكراتتار مەن رەسپۋبليكاشىلدار سەناتور تۋرالى ەستەلىكتەر ايتىپ، ونىڭ الەمدىك ارەنادا ەرەكشە ءرول اتقارعانىن ەسكە الىپ جاتىر. كوپشىلىگى ونىڭ اسكەري- تەڭىز كۇشتەرى قاتارىندا ايبىندى قىزمەت اتقارعانىن جانە ۆەتنامداعى سوعىستا تۇتقىنعا ءتۇسىپ قالعان كەزدە تانىتقان قايسارلىعىن ەسىنە الدى.
ۆەتنام سىرتقى ىستەر ءمينيسترى فام بين مين 27 - تامىزدا حانويداعى ا ق ش ەلشىلىگىندە كوڭىل ايتۋ كىتاپشاسىنا «دجون ماككەين سوعىس سالعان جارانى جازۋعا جانە ا ق ش پەن ۆەتنام اراسىنداعى قارىم- قاتىناستىڭ دۇرىستالۋىنا كوپ ەڭبەك ءسىڭىردى» دەپ جازدى.
ءدام- تۇزى بىتەر شاقتا ماككەين وتباسىنىڭ ورتاسىنا ورالىپ، اريزوناداعى ۇيىندە توسەك تارتىپ جاتىپ «تولاسسىز تولقىن: جاقسى زامان، ءادىل ءىس، ۇلى شايقاس جانە باسقاسى» اتتى كىتابىن جازىپ بىتىرگەن.
ۇزاق ۋاقىت ا ق ش سەناتىنىڭ قارۋلى كۇشتەر قىزمەتى كوميتەتىنىڭ ءتوراعاسى بولعان ماككەين قورعانىس سالاسى مەن حالىقارالىق قاتىناستار بويىنشا بىلىكتى ساراپشى رەتىندە تانىلعان ەدى.
ءبىر پارتيانىڭ مۇشەسى بولسا دا، ماككەين پرەزيدەنت ترامپتىڭ ساياسي شەشىمدەرىنە ءجيى قارسى شىعاتىن. اسىرەسە، رەسەي مەن پرەزيدەنت ۆلاديمير پۋتينگە قاتىستى مالىمدەمەلەرىن سىنايتىن.
وتكەن ايدا ماككەين: «پۋتين - امەريكانىڭ دوسى ەمەس، باسەكەلەسى دە ەمەس. پۋتين - امەريكانىڭ جاۋى. ءبىز قالاعاندىقتان ەمەس، ءوزى سول جولدى تاڭداپ العاندىقتان» دەگەن.
2017 -جىلى ماككەين پرەزيدەنتتىڭ ۇسىنىسىمەن وباما كەزىندە قابىلدانعان دەنساۋلىق ساقتاۋ زاڭىن سەنات وزگەرتپەك بولعان كەزدە قارسى شىعىپ، ۇسىنىستى وتكىزبەي تاستاپ، ترامپتى ءبىر اشۋلاندىرعان.
دجون ماككەيننىڭ اكەسى مەن اتاسى ا ق ش- تىڭ اسكەري تەڭىز كۇشتەرىنىڭ ادميرالدارى بولعان. ءوزى دە تەڭىز كۇشتەرىنىڭ اسكەري ۇشقىشى بولۋدى قالاعان. ماككەين 1967 -جىلى ۆەتنام سوعىسىندا 31 جاسىندا ۇشاعىنا وق ءتيىپ، جاۋ تەرريتورياسىنا قۇلاعان سوڭ تۇتقىنعا ءتۇسىپ قالعان. سولتۇستىك ۆەتنام تۇرمەسىندە التى جىل ازاپتاۋدان ءتىرى شىققان. ماككەيندى ۆەتنامدىق تاراپ ەرتە بوساتپاق بولعان كەزدە ول وزىنەن بۇرىن تۇتقىنعا تۇسكەن امەريكالىق ساربازداردىڭ بوساتىلۋىن تالاپ ەتىپ، بۇل ۇسىنىستان باس تارتقان. بەس جارىم جىلدان كەيىن بارىپ وتانىنا ورالعان دجون ماككەين ازاپتاۋ كەزىندە قولدارى مەن اياعىنا تۇسكەن جاراقاتى تولىق جازىلماعان كۇيى دۇنيەدەن ءوتتى.
www.azattyq.org
