الماتىنىڭ ورتالىق ساياباعى قالاي وزگەرەدى؟

الماتى. قازاقپارات - الماتى اكىمى باۋىرجان بايبەك ورتالىق مادەنيەت جانە دەمالىس ساياباعىنداعى جوندەۋ جۇمىستارىنىڭ جاعدايىن تەكسەردى، دەپ حابارلايدى قازاقپارات ءتىلشىسى اكىمدىكتىڭ باسپا ءسوز قىزمەتىنە سىلتەمە جاساپ.

ساياباقتىڭ باسقارۋشى كومپانياسى جاڭا سۋبۇرقاقتار، بالالار مەن سپورت الاڭدارىن سالىپ جاتىر. قالانى رەكونسترۋكتسيالاۋعا بيلىك قولداۋ كورسەتىپ وتىر. ال جەكە قارجىدان جالپى مولشەرى 1,6 ميلليارد تەڭگە ينۆەستيتسيا تارتىلدى. سونداي-اق قۇزىرەتتى كومپانيا جاڭا جانە زاماناۋي اتتراكتسيوندار ساتىپ الۋدى جوسپارلاپ وتىر.

«ورتالىق مادەنيەت جانە دەمالىس ساياباعى اينالاسىنا جاڭادان 182 جارىق دىڭگەكتەرى ورناتىلدى. جاياۋ جۇرگىنشىلەرگە ارنالعان جولدارعا كافەل توسەلىپ، جاسىل ايماق كەڭەيتىلگەن. ساياباق اۋماعى بىرنەشە تاقىرىپتىق ايماقتارعا بولىنگەن. ساياباق ورتالىعىنداعى بۇرىنعى اۆتوتۇراق قازىر سكەيتودروم مەن روللەردروم، ستريت-ۆوركاۋت، تەننيس كورتى، باسكەتبول جانە بالالار الاڭىنا اينالدى»، - دەپ مالىمدەدى اكىمدىكتىڭ باسپا ءسوز قىزمەتى.

قازىر ساياباقتا بۇرىنعى سۋبۇرقاقتاردى قالپىنا كەلتىرۋ جانە جاڭاسىن ورناتۋ جۇمىستارى ءجۇرىپ جاتىر. جازعى ساحنانىڭ شىعىس جاعىنا ەۋروپالىق قوندىرعىلاردى قولدانا وتىرىپ قۇرعاق سۋبۇرقاق سالىنىپ جاتىر.

اكىمدىكتىڭ مالىمەتىنشە، نەگىزگى جۇمىستار بيىل قازان ايىنا دەيىن اياقتالادى.