قىتاي، جاپون سپورتشىلارى قايرات ەراليەۆكە قيانات جاسالعانىن ايتتى - مىرزاعالي ايتجانوۆ
- مىرزاعالي قۇلان ۇلى، ازيا ويىندارىنداعى بوكسشىلارىڭىزدىڭ اياق الىسى قالاي؟
- مەن ءوزىم باپتايتىن ەرلەر قۇراماسىنان جەتى بوكسشىعا ءۇمىت ارتىپ، جاكارتاعا الىپ كەلدىم. سول جەتەۋدىڭ التاۋى جارىس جولىندا. كەشە، ءبىر بوكسشىمىز قايرات ەراليەۆ قانا جارىس جولىنان شىعىپ قالدى. قالعان التى بوكسشى شيرەك فينالعا ءوتتى. ونى وزدەرىڭىز دە بايقاپ، كورىپ وتىرعان بولارسىزدار.
- قايرات قاي جەردە ءمۇلت كەتتى؟
- مەن ءوز شاكىرتىمنىڭ جەكپە-جەگىنە كوڭىلىم تولدى. ول كەشە جامان جۇدىرىقتاسقان جوق. بارىنشا ەل نامىسىن ابىرويمەن قورعاۋعا تىرىستى. قارسىلاسىنان ءۇش راۋند بويى باسىم بولدى. وكىنىشكە قاراي، تورەشىلەر شەشىمى باسقاشا بولدى. ارتىنان وسىندا جۇرگەن ارىپتەستەرىمىز قايراتقا قيانات جاسالعانىن ايتىپ جاتتى. قىتاي، جاپون سپورتشىلارى دا، باپكەرلەرى دە بىزگە قايراتتىڭ قارسىلاسىنىڭ جەڭىسىنە كۇمانمەن قاراعانىن ايتتى. ءبىراق، ول دا وسال بوكسشى ەمەس، الەم چەمپيوناتىنىڭ قولا جۇلدەگەرى، ازيا چەمپيوناتىنىڭ جەڭىمپازى. وليمپيادا ويىندارىندا ونەر كورسەتىپ جۇرگەن بوكسشى. كەزىندە سەرىك ساپيەۆكە، باقتيار ارتايەۆقا دا وسىنداي قىسىمدار جاسالعان بولاتىن. ءبىراق، ولار سول تورەشىلەردىڭ قياناتىنان قيراپ قۇلاپ كەتكەن جوق. ارتىنان تالاي بيىكتەردى باعىندىردى. وليمپيادا چەمپيونى بولدى. سوندىقتان، ءبىر ساتسىزدىككە بولا ءبىز مويىنسۇنايىق دەپ تۇرعان جوقپىز. قايرات ءالى وتىزعا دا تولعان جوق. الار اسۋى ءالى الدا دەپ سەنەمىن. بىزدە وليمپيادا، الەم چەمپيوندارى ساناۋلى عانا. سول ساناۋلى بوكسشىلاردىڭ ءبىرى وسى - قايرات ەراليەۆ.
- وزگە جىگىتتەرىمىزدىڭ جەكپە-جەگىنە قالاي باعا بەرەسىز؟
- بارلىق بوكسشىلار وتە جاقسى دايىندىقپەن كەلدى. العاشقى جەكپە-جەكتەرىن جەڭىسپەن باستاپ، شيرەك فينالعا شىقتى. ەندى، ءبىر-ەكى قادامىن ءساتتى وتسە، ارى قاراي مەدالعا دا قول جەتكىزەمىز. سول ءۇشىن قالعان بوكسشىلاردىڭ دايىندىعىمەن جۇمىسىمىزدى جالعاستىرىپ جاتىرمىز.
- بۇيىرسا نەشە التىن الامىز دەپ جوسپارلاپ وتىرسىزدار؟
- وسىعان دەيىن جوسپارىمىزدى ايتقان بولاتىنمىن. بۇل - ازيا ويىندارى، «سارىقۇرلىقتىڭ» كىل مىقتىلارى جينالعان دودا. سوندىقتان وسال قارسىلاستار جوق. بۇيىرتقانىن الامىز. ۋاقىتىندا كورە جاتارسىزدار...
- اڭگىمەڭىزگە راحمەت!
اۆتور: كۇنسۇلتان وتارباي
