سەۋلدە استانا تۋرالى كورمە ءوتىپ جاتىر
بۇل تۋرالى قازاقستان رەسپۋبليكاسى تۇڭعىش پرەزيدەنتى - ەلباسى قورى باسپا ءسوز قىزمەتىنە سىلتەمە جاساپ قازاقپارات ءتىلشىسى حابارلايدى.
«Korea Foundation» عيماراتىندا سەۋل تۇرعىندارى مەن قوناقتارىنا قازاقستاننىڭ كەڭ ولكەسىنىڭ سۋرەتتەرى ۇسىنىلدى. مۇنداعى باستى ەكسپوزيتسيا - استانا.
ق ر تۇڭعىش پرەزيدەنتى - ەلباسى قورى مەن كورەيالىق «Korea Foundation» قورى اراسىندا سەرىكتەستىك مەموراندۋمعا قول قويىلدى. ەكسپوزيتسياعا قازاقستاننىڭ وڭتۇستىك كورەياداعى توتەنشە جانە وكىلەتتى ەلشىسى باحىت دۇيسەنبايەۆ قاتىستى.
«قوردا عىلىمي بىلىمدىك، مادەني اعارتۋشىلىق سالاعا باسىمدىق بەرىلگەن. سونداي-اق، ەكى ەلدىڭ كۇش بىرىكتىرۋىنە باعىتتالعان جوبالار بار. حالىقارالىق ديسكۋسسيا الاڭى رەتىندە قور جانىنداعى الەمدىك ەكونوميكا جانە ساياسات ينستۋتىنىڭ استانا كلۋبى بەكىتىلگەن»، - دەدى اتالعان قوردىڭ الماتىداعى وكىلدىگىنىڭ ديرەكتورى سەرگەي توحتاروۆ.
كورمە قوناقتارى قازاقستاننىڭ قوعام، ساياسات، مادەنيەت قايراتكەرلەرىمەن تانىستى. قازاقستاننىڭ ۇلتتىق مەرەكە كۇندەرى تۋرالى اقپارات الىپ، ۇلتتىق داستۇرىنەن ماعلۇمات الدى. سونداي-اق، رەسپۋبليكالىق ساياجايلار مەن قورىقتاردى تاماشالادى. سادجانا مۇرزاليەۆانىڭ قوبىزدا ويناعان شىعارماسى اتموسفەرانى ايشىقتاي ءتۇسىپ، كورەرمەننىڭ قازاقستاندى جەتە تانۋىنا مۇمكىندىك بەردى.
كەش سوڭىندا كەلۋشىلەرگە استانا 20 جىلدىعىنا ارنالعان البوم تاراتىلدى. «استانا - ۇلى دالا قازىناسى» كورمەسى سەۋلدە 3- قىركۇيەككە دەيىن جالعاسادى.
