عالىمدار جاھاندىق جىلىنۋعا سەبەپشى بولاتىن زاتتى انىقتادى

استانا. قازاقپارات - پلاستيك قورشاعان ورتانى لاستاپ قانا قويماي، جانۋارلار مەن ادامدارعا قاۋىپ ءتوندىرىپ، كليماتتىڭ وزگەرۋىنە ىقپالىن تيگىزەتىنى انىقتالدى، دەپ حابارلايدى ب ۇ ۇ- نىڭ قورشاعان ورتا جونىندەگى باعدارلاماسى گاۆاي ۋنيۆەرسيتەتىندە وتكىزىلگەن جاڭا زەرتتەۋدىڭ مالىمەتتەرىنە سىلتەمە جاساپ.

عالىمداردىڭ انىقتاۋىنشا، پلاستيك كۇن رادياتسياسىنىڭ ىقپالىمەن ىدىراپ، مەتان مەن ەتيلەننىڭ پارنيكتىك گازدارىنىڭ قوسپاسىن بولەدى. مۇنىمەن قويماي، ەميسسيانىڭ كولەمى ۋاقىت وتە كەلە ۇلعايا بەرەدى.

زەرتتەۋشىلەر قۇرىلىس ماتەريالدارىندا، ماتالاردا، پلاستيكتان جاسالعان بۇيىمداردىڭ قۇرامىندا بولاتىن ءبىرقاتار ماتەريالداردى سىناقتان وتكىزدى.

«تەستىلەۋ ناتيجەسىنەن بەلگىلى بولعانداي، پلاستيك كليماتقا اسەر ەتەتىن گازدىق قوسپالاردى بولەدى. پلاستماسس بۇيىمداردى وندىرە بەرگەن سايىن جانە قورشاعان ورتادا نەعۇرلىم پلاستيك بولسا، سوعۇرلىم بۇل ەميسسيالاردىڭ كولەمى دە ۇلعايا بەرەدى»، دەلىنگەن حابارلامادا.

زەرتتەۋشىلەر اسىرەسە تسەللوفان پاكەتتەردىڭ قاۋىپتى ەكەنىن ەرەكشە اتاپ ءوتتى. سەبەبى ونىڭ قۇرامىندا مەتان مەن ەتيلەننىڭ بەلسەندى كوزدەرىنىڭ ءبىرى - پوليەتيلەن بار. 1950 -جىلدان باستاپ 8 ميللياردتان استام پلاستيك پاكەتتەر دايىندالعان. الداعى 20 جىل ىشىندە جىل سايىنعى ءوندىرىس كولەمى ەكى ەسە ۇلعايادى دەپ كۇتىلۋدە.

زەرتتەۋشىلەردىڭ پىكىرىنشە، ولاردىڭ اشقان جاڭالىقتارى جاھاندىق جىلىنۋدى تۋدىرۋعا ىقپالىن تيگىزەتىن پلاستيكتى پايدالانۋمەن كۇرەسۋ قاجەت ەكەنىن راستايدى.