اقمولا اكىمى جۋرناليستەر ءۇشىن گيد قىزمەتىن اتقاردى
شۋچە- بۋراباي كۋرورتىنىڭ باستى PR مەنەدجەرى رەتىندە مالىك مىرزالين جۋرناليستەر مىنگەن اۆتوبۋستا «بۋرابايعا قوش كەلدىڭىزدەر، بۇگىن وبلىس اكىمى قىزمەتىنەن بولەك، سىزدەرگە ارنالعان ساياحاتتا ءوزىم جەتەكشىلىك ەتەمىن»، - دەپ باستادى ءسوزىن وبلىس باسشىسى.
«سىزدەرگە تۋريزمدى دامىتۋدا قانداي جۇمىستار جاسالىنىپ جاتىر، بولاشاققا قانداي جوسپارلار بارىن ايتىپ، كورسەتكىمىز كەلەدى. ارينە پروبلەمادا جوق ەمەس، ول پروبلەمالاردى ءبىز بىلەمىز»، - دەپ تولىقتىردى ءوز ءسوزىن.
ونىڭ ايتۋىنشا بۋراباي كەنتىندە اۋماعى 14 گەكتار جەردى قامتيتىن جاڭا مولتەكاۋدان قۇرىلىسى باستالدى، سونىمەن قاتار كەنتتىڭ ورتالىق الاڭى مەن كوشەلەرىندە جوندەۋ جۇمىستارى جۇرگىزىلىپ، جاڭادان 2 اللەيا سالىندى جانە قالدىقتاردى قالدىقتاردى سۇرىپتاپ تاستايتىن زاماناۋي كونتەينەرلەر قويىلدى.
«ورتالىق كوشەلەردە جاياۋ جۇرگىنشىلەرگە ارنالعان جول بەلگىلەرى سالىندى، بۇرىن بولماعان، سونىڭ اسەرىنەن جولدا وقىس وقيعالار ءجيى ورىن الاتىن، قازىر ايتارلىقتاي تىيىلدى، بۇل الدىمەن قاۋىپسىزدىكتىڭ قامتاماسىز ەتىلۋى»، - دەدى ءوڭىر باسشىسى.
گيد الدىمەن ورتالىق الاڭ جانە تۋريستىك ورتالىقپەن تانىستىردى. وندا ولكەتانۋ جانە تابيعات مۋزەيى، حايۋاناتتار ساياباعى مەن حايۋاناتتاردى تاماشالاۋ بۇرىشى، كادەسىي دۇكەندەرى، ويىن-ساۋىق ورتالىقتارى ورنالاسقان.
بۇل جەردە سول سياقتى تۋريستەرگە تەگىن جول كارتاسى مەن تەرمينالدى پايدالانۋعا بولادى. «بولاشاقتا حايۋاناتتار ساياباعىن سافاري- ساياباق رەتىندە اياسىن كەڭەيتۋ جوسپاردا بار»، - دەپ تولىقتىردى وبلىس اكىمى.
ودان ءارى ساياحات كول جاعالاۋىنا قاراي جالعاستى. كول جاعاسىنا اعىلشىن ينۆەستورلارى 10 سۋ سىرعاناقتان تۇراتىن توبەشىكتەن تۇراتىن ءۇستى جابىق اكۆاساياباق سالۋ نيەتتەرى بار. قۇنى 200 ميلليون تەڭگەنى قۇرايتىن ينۆەستورلاردىڭ ەسەبىنەن سالىنىپ جاتقان اكۆاساياباقتى 2019 -جىلى اياقتالادى دەپ كوزدەلىپ وتىر.
«كەلىسىم وڭايعا تۇسپەدى، سەبەبى ينۆەستورلار اشىق اسپان استى اكۆاساياباعىن تۇرعىزعىسى كەلدى، ال بىزگە تۋريستەر ءۇشىن اكۆاساياباقتىڭ جىل بويى جۇمىس ىستەگەنى ءتيىمدى»، - دەدى م. مىرزالين.
ءسوز اراسىندا ايماق باسشىسى كول جاعالاۋىندا اقىلى جانە تەگىن جاعاجايلاردىڭ بارىن ايتىپ، باعاسى 500 تەڭگەدەن باستالاتىنىن جانە ونىڭ ىشىنە بىرنەشە قىزمەتتەردىڭ كىرەتىنىن تىلگە تيەك ەتتى.
ودان ءارى اكىم جۋرناليستەرگە سەرۋەن رەتىندە بولەكتاۋدىڭ بيىك جەرىنە شىعۋدى ۇسىندى. تاۋدىڭ بيىك تۇسىنان جاياۋ شىققان جۋرناليستەر بۋرابايدىڭ ەڭ عاجايىپ كورىنىسىن تاماشالاۋعا مۇمكىندىك الدى.
ساياحات سوڭى بۋرابايداعى 4 جۇلدىزدى «Park House» قوناق ءۇيىنىڭ اسپان استى تەرراساسىندا بۋرابايدا تۋريزمدى دامىتۋدا جۇزەگە اسىرىلاتىن باستى جوبالاردى تانىستىرۋعا ارنالعان باسپا ءسوز ءماسليحاتىنا ۇلاستى.
ايتا كەتۋ كەرەك، وبلىس اكىمى ساياحات بارىسىندا كۋرورتتى ايماقتاعى ۋاقىت سوزباي شەشىمىن تابۋى ءتيىس ءبىرقاتار پروبلەمالارعادا توقتالىپ ءوتتى. سونىڭ ءبىرى اجەتحانا ماسەلەسى «كوبىسى اكىم بۇنداي ۇساق- تۇيەك ماسەلەمەن اينالىسپاۋى ءتيىس دەپ سىناپ جاتادى. مەن ول ويمەن كەلىسپەيمىن، كەرىسىنشە اينالىسۋى كەرەك»، - دەدى اكىم.
اقمولا باسشىسى اجەتحانا ماسەلەسىن بەكەر كوتەرمەدى، سەبەبى حالىق اراسىندا جانە الەۋمەتتىك جەلىلەردە ءجيى قوزعالاتىن تاقىرىپ. اسىرەسە «استانا- بۋراباي» تاسجولى بويىنداعى اجەتحانالار ماسەلەسى كۇنى بۇگىنگە دەيىن سىنعا ۇشىراپ كەلدى. بۇگىندە تاسجول بويىندا «قازاۆتوجول» ۇلتتىق كومپانياسىنىڭ رەسپۋبليكالىق جوباسى اياسىندا سالىنعان «Kazway» پاۆيلونى ىسكە قوسىلعان. ونىڭ ىشىندە ءدامحانا، دۇكەن، اجەتحانا، تەلەفون قۋاتتايتىن قۇرىلعى، wi-fi، اۆتوتۇراق، باسقادا جولاۋشىعا قاجەتتىنىڭ ءبارى بار. ءبىر پاۆيلوننىڭ قۇنى 22 ميلليون تەڭگەنى قۇرايدى جانە ول شاعىن كاسىپكەرلەرگە جالعا بەرىلۋدە. اقمولا وبلىسى بويىنشا 6 پاۆيلون بار، ونىڭ 4 ى تاسجول بويىندا، 2 ى بۋراباي كۋرورتىندا ورنالاسقان.
بۇعان دەيىن ايتقانىمىزداي باسپا ءسوز تۋرى بارىسىندا وبلىس اكىمى حالىق اراسىندا ءجيى ايتىلىپ جۇرگەن بۋرابايدا دەمالۋ تۇركيامەن سالىستىرعاندا نەگە قىمبات دەگەن جۋرناليستەردىڭ سۇراعىنا تۇسىنىكتەمە بەرگەن بولاتىن.
سونىمەن قاتار، ايماق باسشىسى جۇمىس بابىمەن بۋرابايعا ءجيى كەلگەنىمەن دەمالۋدىڭ ءساتى تۇسە بەرمەيتىنىن ايتتى.
قورىتىندىلاي كەلسەك بۋراباي كۋرورتىنا دەمالۋعا كەلەتىن تۋريستەردىڭ سانى جىل ساناپ ارتۋدا، وتكەن جىلى 850 مىڭ تۋريست كەلسە، بيىل بۇل كورسەتكىش تاعى 50 مىڭعا ارتادى دەپ كۇتىلۋدە.
