الماتىدا گاز ارزاندادى
الماتى اكىمى باۋىرجان بايبەك قالا تۇرعىندارى ءۇشىن ەڭ وزەكتى ماسەلەلەردىڭ ءبىرى - كوممۋنالدىق قىزمەتتەرگە تاريف تاعايىنداۋ بيلىك پارتياسىنىڭ باقىلاۋىندا ەكەنىن ايتتى.
بۇگىندە 1,5 ميلليونعا جۋىق الماتىلىق جەرگىلىكتى بيۋدجەت ەسەبىنەن كوممۋنالدىق قىزمەتتەردى بۇرىنعى باعادا تۇتىنۋدا. كوممۋنالدىق تولەمدەرى جالپى تابىسىنىڭ 10 پايىزىنان اساتىن تۇرعىندارعا كومەك رەتىندە قاراجات ءبولىندى.
«مەملەكەت باسشىسى تاريفتى نەگىزسىز جوعارىلاتۋعا جول بەرمەۋدى تاپسىردى. بۇل ادامداردىڭ تىرشىلىگىنە، كاسىپكەرلەرگە، باعالارعا، تىكەلەي اسەر ەتەدى. وسى ماقساتتا قالالىق پروكۋراتۋرا مونوپوليستەر اراسىندا اۋقىمدى تەكسەرۋ جۇرگىزدى. ناتيجەسىندە باعانى سەبەپسىز كوتەرۋ فاكتىلەرى انىقتالدى. دەرەۋ شارا قولدانىلىپ، 1,5 ميلليونعا جۋىق ازاماتتاردىڭ قۇقىقتارى قورعالدى. مونوپوليستەرگە تۇتىنۋشىلارعا 4,7 ميلليارد تەڭگەگە جۋىق وتەماقى تولەۋ مىندەتى جۇكتەلدى. كوممۋنالدىق قىزمەت قۇنىن ارتتىرۋعا ەشقانداي دا نەگىز جوق. ءبىزدىڭ الماتىلىقتار ارتىق تولەم جاساماس ءۇشىن كەز كەلگەن زاڭسىز ارەكەتتەر توقتاتىلادى. پرەزيدەنتتىڭ تاپسىرماسى بار جانە ول ورىندالادى»، - دەدى باۋىرجان بايبەك.
تاريف جايىن بايانداۋ بارىسىندا الماتى پروكۋرورى بەرىك جۇيرىكتايەۆ قالانىڭ باستى قاداعالاۋشى ورگاندارى جۇرگىزگەن تەكسەرۋ بارىسىندا ءبىرقاتار مونوپوليالىق سۋبەكتىلەردىڭ شىعىنداردى نەگىزسىز وسىرگەنى جانە ينۆەستيتسيالىق باعدارلامالاردى ورىنداماۋ جايتتارى انىقتالعانىن ايتتى.
«ءبىز «الماتى ەنەرگو سبىتتا» ەلەكتر قۋاتىن رەتتەۋ قىزمەتىنە تاريفتىك سمەتادا جاريالانعان سومانىڭ 70 پايىز، ال امورتيزاتسيالىق اۋدارىمدار بويىنشا % 30 عانا جۇمسالعانىن دالەلدەدىك. ەنەرگوسبىت ءوز كىناسىن مويىنداپ، جاۋاپكەرشىلىككە تارتىلدى. «الاتاۋ جارىق كومپانياسى» توتەنشە رەتتەۋ شارالارىن ەنگىزۋ ەسەبىنەن ەلەكتر قۋاتىن بەرۋ تاريفىن كوتەردى. كەيىنىرەك انىقتالعانداي، ولار بۇل شارانى توتەنشە جاعداي ساناتىنا جاتپايتىن كىشىگىرىم اۆاريالار مەن اعىمداعى جوندەۋ كەرەكتىگىمەن نەگىزدەگەن. ءبىزدىڭ تالاپتارعا سايكەس، ۋاكىلەتتى ورگان ءوز شەشىمىنىڭ كۇشىن جويدى. قابىلدانعان شارالار ارقاسىندا 2,17 ميلليارد تەڭگە شىعىنداردى وتەۋ ءۇشىن وتەماقى تاريفتەرى ەنگىزىلدى. 2,83 ميلليارد تەڭگەگە بولاشاق شىعىننىڭ الدىن الدىق. اعىمداعى تاريف 5,6 پايىزعا تومەندەدى»، - دەدى بەرىك جۇيرىكتايەۆ.
قالا پروكۋرورىنىڭ اقپاراتى بويىنشا، بۇعان قوسا «قازترانس گاز ايماق» تەكسەرىستەن وتكەن. مۇندا ينۆەستيتسيالىق باعدارلامانىڭ كەيبىر جۇمىستارى اتقارىلماعانى بەلگىلى بولدى. پروكۋرورلىق شارالاردىڭ ارقاسىندا 425 ميلليون تەڭگە وتەماقىلىق تاريف ەنگىزىلدى.
اۆتور: ارايلىم جولداسباي
