22:09, 25 - تامىز 2018 | GMT +5
ترامپتى ءوزىنىڭ جەرلەۋ راسىمىنە شاقىرۋدان باس تارتقان سەناتور ەمىن توقتاتتى
استانا. قازاقپارات - بۇل سەناتور ءتىپتى 2008 -جىلعى قۇراما شتاتتار پرەزيدەنتىنىڭ سايلاۋىندا باراك وبامامەن باقتالاسقان ادام. ا ق ش سەناتورى دجون ماككەين مي وبىرى دەرتىنەن 1 جىل بويى ەم قابىلداپ كەلگەنى الەمگە ايان.
ءبىراق ەندى ونىڭ تۇز- ءدامى تاۋسىلىپ، كۇندەرى ساناۋلى قالعان سىڭايلى. بۇل تۋرالى ماككەين وتباسى رەسمي تۇردە شۇعىل مالىمدەمە جاسادى.
مالىمدەمەگە سايكەس، سەناتور دجون ماككەين گليوبلاستوما، ياعني ميداعى قاتەرلى ىسىكتەن ەم قابىلداۋىن توقتاتقان. سەبەبى جاسى ۇلعايعان سەناتوردى بۇل اۋرۋ كۇن وتكەن سايىن دەندەپ بارا جاتىر. سونداي- اق ماككەين وتباسى وسى كەزگە دەيىن سەناتوردىڭ كوڭىلىن سۇراپ، ونىڭ ساۋىعىپ كەتۋىنە تىلەكتەستىك بىلدىرگەن ادامداردىڭ بارلىعىنا زور العىستارىن ايتتى.
ايتا كەتۋ كەرەك، ماككەيندەر وتاعاسى ومىردەن وزعان جاعدايدا ونى جەرلەۋ راسىمىنە ترامپتى شاقىرمايتىنىن ايتىپ، ا ق ش پرەزيدەنتىنىڭ اكىمشىلىگىن رەسمي تۇردە ەسكەرتىپ قويدى. مۇنىڭ بارلىعىنا دجون ماككەين مەن دونالد ترامپتىڭ جۇلدىزدارىنىڭ قارسى بولۋى سەبەپكەر.
www.24.kz
