اقمولا اكىمى بۋرابايدا دەمالۋ تۇركيامەن سالىستىرعاندا نەگە قىمبات ەكەنىن ءتۇسىندىردى
«بۇل - بۇگىنگى كۇنگە دەيىن اقمولا وبلىسىنىڭ اكىمدەرىنە ۇنەمى قويىلاتىن، جاۋىر بولعان ءارى قيىن سۇراقتىڭ ءبىرى. ويتكەنى، وسى ماسەلە الەۋمەتتىك جەلىلەردە ءجيى قوزعالادى. قازىر جاعداي ءبىر قالىپقا تۇسۋدە. بۇل جەردە ماسەلە قىزمەت كورسەتۋ ساپاسى مەن باعاعا قاتىستى، ال ول ءوز كەزەگىندە باسەكەگە كەلىپ تىرەلەدى. بۇگىنگى كۇنگە دەيىن بۋراباي كۋرورتىندا سونشالىقتى قىزۋ باسەكەلەستىك بولمادى. ادامدار جىلىنا تەك ەكى- ءۇش اي، ياعني جازعى دەمالىس كەزىندە جۇمىس ىستەيدى دە، سول ۋاقىت ارالىعىندا جىل بويىنا جەتەتىن تابىستى تاپقىسى كەلەدى. سوندىقتان دا، باعا ءوسىمى ورىن الادى. ءبىز كۋرورتتىڭ تەك ماۋسىممەن جۇمىس ىستەمەي، جىل بويى قىزمەت ەتۋىن جانە باسەكەلەستىكتىڭ بولعانىن قالايمىز. بۇل تۇرعىدا مەملەكەت ينۆەستورلاردى تارتىپ، جاڭا ينفروقۇرىلىمدار قولعا الىنىپ جاتىر. ياعني جىل بويى جۇمىس ىستەيتىن قوناقۇيلەر سالىنۋدا. جاڭا سالىنىپ جاتقان قوناقۇيلەر مەن دەمالىس ورىندارىنىڭ قىزمەتى مەن باعاسى رەتتەلەدى. ال بۇرىننان قىزمەت اتقارىپ جاتقان قوناقۇيلەر باسەكەگە سايكەس ساپالى جانە قولجەتىمدى قىزمەت كورسەتۋى ءتيىس، وعان سايكەس كەلمەسە باعانى ءتۇسىرۋى كەرەك. مەن وتەلدەردىڭ جۇلدىزدى ساناتىنا قاراي ستاندارتتالۋ ماسەلەسىن ءجيى قوزعايمىن. ويتكەنى ستاندارتتاۋ - وتەل قىزمەتىنىڭ ساپاسىن جاقسارتۋعا اسەر ەتەدى.
ودان بولەك Four seasons باعدارلاماسى بويىنشا ار اي سايىن 3-4 ماڭىزدى ءىس- شارالاردى وتكىزەتىن بولامىز. ياعني، كەلگەن تۋريستەر ءۇشىن تابيعات تاماشالاۋدان وزگە دە كورۋگە تۇراتىنداي، اتاپ ايتارلىق شارالار بولۋى كەرەك جانە ول تۇراقتى تۇردە ۇيىمداستىرىلۋى ءتيىس. تۇراقتى دەگەن سەبەبىم - كەلگەن تۋريستەر جىل سايىن بەلگىلى ءبىر ماۋسىمدا قانداي دا ءبىر ناقتى شارانىڭ بولاتىنىن ءبىلىپ، ارنايى كەلسە دەيمىن. ول سپورتتىق، مادەني، ويىن- ساۋىق ت. ب. شارالارى بولۋى مۇمكىن. سول كەزدە وتەل يەلەرى ءبىر مەزگىل جۇمىس ىستەپ، قالعان ۋاقىت جابىق تۇرعاننىڭ ءتيىمسىز ەكەن تۇسىنەدى. ارينە، اتالعان ماسەلەنى كەشەندى تۇردە شەشۋ كەرەك. سوندىقتان ءبىز «Burabay PASS» تۋريستەرگە ارنالعان كارتا جوباسىن ىسكە قوستىق. ول بويىنشا الدىن الا قالاعان قوناقۇيدى بروندايسىز، سودان سوڭ سىزگە كەشەندى كارتا بەرىلەدى. ونىڭ ىشىندە ءبارى قاراستىرىلعان، بۇل سىزگە 50 پايىزعا دەيىن قارجىڭىزدى ۇنەمدەۋگە كومەكتەسەدى. مەنىڭ ويىمشا، بۇل وتە قولجەتىمدى باعا. ال سودان عانا سوڭ بىزدە نەمەسە تۇركيادا دەمالعاننىڭ قانشالىقتى ارزانعا تۇسەتىنىن سالىستىرۋعا بولادى»، - دەدى اقمولا وبلىسىنىڭ اكىمى مالىك مىرزالين.
ايتا كەتۋ كەرەك، ۇستىمىزدەگى جىلى اقمولا وبلىسىندا تۋريزم يندۋسترياسىن دامىتۋدىڭ جول كارتاسى شەڭبەرىندە 7 نەگىزگى باعىت بويىنشا 119 ءىس- شارا جوسپارلانعان. مەملەكەت باسشىسىنىڭ تاپسىرماسىمەن اقمولا وبلىسىندا قىزمەت كورسەتۋ ساپاسىن ارتتىرۋ ماقساتىندا سەرتيفيكاتتالعان قوناق ۇيلەر سانى 5 ەسەگە ارتتى. قازىرگى ۋاقىتتا ولاردىڭ سانى - 22. جىل سوڭىنا دەيىن 36 قوناق ءۇي سەرتيفيكاتتالادى.
اۆتور: داۋلەت ىزتىلەۋ
