فيلم گولليۆۋدقا ەمەس، قازاققا جاقىن بولسىن - ۇشكەمپىروۆ ءوزى تۋرالى تۇسىرىلەتىن كينو جايلى

استانا. قازاقپارات - وليمپيادا چەمپيونى اتانعان تۇڭعىش قازاق - جاقسىلىق ۇشكەمپىروۆ ءوزى جايلى تۇسىرىلەتىن كينوعا قاتىستى پىكىرىن ءبىلدىردى، دەپ حابارلايدى قازاقپارات ءتىلشىسى.

«بىلتىر وسى ۋاقىتتا مادەنيەت جانە سپورت ءمينيسترى ارىستانبەك مۇحامەدي ۇلى شاقىرىپ، «ءسىز وليمپيادا چەمپيونىسىز. ءسىز تۋرالى فيلم ۇرپاققا كەرەك، ءسىز جايىندا كينو تۇسىرسەك» ، دەدى. مەن رۇقساتىمدى بەرگەننەن كەيىن كينو ءتۇسىرۋدى «قازاقفيلمنىڭ» پرەزيدەنتى باقىت (باقىت قايىربەكوۆ - اۆت. ) باۋىرىمىزعا تاپسىرعان ەكەن. سودان بيىل اقشا ءبولىنىپ، 8-ايدان بەرى ءتۇسىرىلىم باستالىپ كەتتى. وندا مەنىڭ بالا كەزىم، وقۋعا تۇسكەن شاعىم، كۇرەستى باستاعان كەزىم قامتىلماق» ، - دەدى جاقسىلىق ۇشكەمپىروۆ و ك ق- دا وتكەن باسپا ءسوز ءماسليحاتىنان كەيىن قازاقپارات تىلشىسىنە.

وليمپيادا چەمپيونى ءتۇسىرىلىم الدىندا «قازاقفيلم» باسشىسىنا نەنى نازارعا الۋ كەرەكتىگىن ەسكەرتكەنىن اتاپ ءوتتى.

«مەنىڭ ءتۇسىرىلىم توبىنا تاپسىرعانىم: «باكە، مەن جايلى ۇلكەن گولليۆۋدقا ەمەس، «مەنىڭ اتىم قوجا» سەكىلدى وزىمىزگە جاقىن، وزىمىزگە ءتان كينو بولسا دەدىم. بالا كەزىمىزدە قانداي ءومىر كوردىك - سونىڭ ءبارىن كورە كەلە قالاي وسى كۇنگە جەتتىك؟ مىنە، وسىنىڭ بارلىعىن جاستارعا كورسەتە ءبىلۋىمىز كەرەك. ەشقاشان ەشكىمنەن ارتىق بولعان جوقپىز. ءالى دە سولاي ەل ورتاسىندا ءجۇرىپ كەلەم. قولىمنان كەلگەنشە سپورتشىلارعا كومەكتەسۋدى دۇرىس كورەمىن. باسقا پلانەتادان تۇسكەن جوقپىن. قاراپايىمدىلىعىمىز، قازاقىلىعىمىز، وتانىمىزعا دەگەن سۇيىسپەنشىلىگىمىز كينو جانرىندا كورسەتىلسە دەيمىز. ۇلتتىق ونەرىمىزدى كورسەتە ءبىلۋىمىز كەرەك. «قازاق - ەلىم» دەگەن ازاماتتاردى ءوسىرۋىمىز كەرەك» ، - دەيدى ول.

جاقسىلىق ۇشكەمپىروۆ فيلمنىڭ ءتۇسىرىلىم بارىسىنا ەش ارالاسپايتىنىن ايتادى.

«ءتۇسىرىلىم جۇمىسىنا باسىنان- اق ارالاسپايتىنىمدى ايتتىم. ءسال ارالاسا باستاپ ەدىم، جان- جاقتان ماعان قوڭىراۋ شالىپ، «جاكە، مەنىڭ بالامدى نە قىلشى.. . مەنىكى اناۋ، مەنىكى مىناۋ» دەگەن سەكىلدى اڭگىمەلەر بولعاننان كەيىن مەن: «اينالايىن، ءوزىمنىڭ نەمەرەمدى دە كىرگىزبەيمىن» دەدىم. ەش نارسەگە ارالاسپايمىز. باستى رەجيسسەر ءبارى ءوزى جاساۋى كەرەك. سوندا عانا دۇرىس بولادى دەگەن ويدامىن» ، - دەپ ءتۇيدى جاقسىلىق ۇشكەمپىروۆ.

ەسكە سالا كەتسەك، وليمپيادا چەمپيونى اتانعان تۇڭعىش قازاق - جاقسىلىق ۇشكەمپىروۆ تۋرالى فيلم ءتۇسىرىلىپ جاتقانىن بۇدان بۇرىن دا جازعان بولاتىنبىز.