ازيادانىڭ التىنشى كۇنى: قازاقستان ۇزدىك وندىققا ءبىرتابان جاقىنداي ءتۇستى
ەسكە سالا كەتسەك، ازيا ويىندارىنىڭ العاشقى كۇنى قازاقستاندىقتار التىن، كۇمىس جانە ەكى قولا مەدال جەڭىپ العان بولاتىن. «التىندى» سەمسەرلەسۋشى دميتري الەكسانين، «كۇمىستى» ەركىن كۇرەستەن دانيار قايسانوۆ، ءدال وسىنداي سپورت تۇرىنەن ساياتبەك وقاسوۆ پەن ادىلەت داۆلۋمبايەۆ قولا مەدالداردى يەلەنگەن ەدى.
ازيا ويىندارىنىڭ ەكىنشى كۇنى ەل قورجىنىنا «كۇمىس» جۇلدە بۇيىردى. ونى وسىعان دەيىن حابارلاعانىمىزداي ايەلدەر كۇرەسىنەن جۇلدىز ەشىموۆا جەڭىپ الدى.
ءدال وسى كۇنى تاەكۆوندوشى فاريزا الدوڭعاروۆا ەل قورجىنىنا تاعى ءبىر قولا مەدالدى سالعان.
تارتىستى سايىستىڭ ءۇشىنشى كۇنى قازاقستان قورجىنىنا ءبىرشاما مەدال ءتۇستى. دەگەنمەن، مەدالداردىڭ ىشىندەگى «التىنى» ول كۇنى بۇيىرمادى. التىننان كەيىنگى كۇمىس جۇلدەنى ۇلتتىق قۇراماعا تاەكۆوندوشى جانسەل دەنيز، بالۋان المات كەبىسپايەۆ، سۋداعى پولودان قازاقستاننىڭ ايەلدەر قۇراماسى الىپ بەردى. ال قولا مەدال ماۋنتينبايكەر كيريلل كازانسيەۆ، بالۋاندار ەلميرا سىزدىقوۆا مەن مەيرامبەك ايناعۇلوۆ، تاەكۆوندوشى رۋسلان جاپاروۆقا بۇيىردى.
ال 22 -تامىزدا قازاقستان قورجىنىنا قۇرلىقتاعى باسەكەنىڭ 8 مەدالى ءتۇستى. ناقتىراق ايتقاندا، اۋىر سالماقتاعى بالۋانىمىز نۇرماحان تىناليەۆ كۇمىس مەدال يەلەندى. ال قالعان 7 قولا مەدالدى جۇزۋدەن دميتري بالاندين، سەمسەرلەسۋدەن قازاقستاننىڭ ەرلەر مەن ايەلدەر قۇراماسى، تاەكۆوندوشى نۇرلان مىرزابايەۆ، بالۋانداردان ەرۇلان ىسقاقوۆ پەن ازامات قىستاۋبايەۆ، ەسكەك ەسۋدەن الەكساندر كۋليكوۆ ەل قورجىنىنا سالدى. وسىلايشا ازيادانىڭ ءتورتىنشى كۇنىن قازاقستان جالپى رەيتينگتە 12- ورىنمەن اياقتاعان ەدى.
كەشە ۇلتتىق قۇراما سپورتشىلارى اسىعا كۇتكەن «التىن» مەدالعا قول جەتكىزدى. اتاپ ايتقاندا، ۆەلوشاباندوز الەكسەي لۋتسەنكو قازاقستاننىڭ ۇلەسىندەگى ەكى التىن مەدالدىڭ ءبىرىن يەلەنىپ وتىر. سونىمەن بىرگە، بۇگىن سۋعا جۇزۋدەن ادىلبەك مۋسين، تاەكۆوندوشى ەراسىل قايىربەك، اكادەميالىق ەسكەك ەسۋدەن الەكساندر وچاپانوۆ، ستەندتىك اتۋدان ماريا دميتريەنكو قولا مەدالعا يە بولدى. جالپى، قازاقستان سپورتشىلارى 2 التىن، 6 كۇمىس، 18 قولا مەدالمەن ازيادانىڭ بەسىنشى كۇنىن 12- ورىنمەن تۇيىندەگەن.
بۇگىنگى كۇندى دە قۇرامامىز جۇلدەسىز اياقتاعان جوق. ۇلەستە - 8 مەدال. ناقتىراق ايتقاندا، ۆەلوشاباندوز الەكسەي لۋتسەنكو قۇراماعا ءۇشىنشى «التىندى» سالسا، كۇمىس مەدالدى جۇپتاسا شىققان تەننيسشىلەر الەكساندر بۋبليك پەن دەنيس ەۆسەيەۆ الىپ بەردى. قولا مەدالگە دجيۋ- دجيتسۋدان نۇرجان سەيدۋالى مەن نارتاي قاجەكوۆ، تەننيسشى جۇپتان گۇزال اينيتدينوۆا/اننا دانيلينا مەن الەكساندر نەدوۆەسوۆ/اننا دانيلينا، جۇزۋدەن دميتريي بالاندين مەن ءدال سول سپورت تۇرىنەن قازاقستان ەرلەر قۇراماسى قول جەتكىزدى.
وسىلايشا، قازاقستان قۇراماسى 34 مەدالمەن ازيا ويىندارىنىڭ جالپى رەيتينگىندە 11-ورىنعا تابان تىرەدى.
