شەتەلدىكتەرگە قازاقستانداعى تۋريستىك نىسانداردى كوپ ناسيحاتتاۋ كەرەك
ونىڭ ايتۋىنشا، شەتەلدىك ساياحاتشىلاردىڭ كوپشىلىگى قازاقستاننىڭ تۋريستىك جەرلەرىنەن حابارسىز.
«قازاقستاندا ۆيزالىق ماسەلەلەر وڭىمەن شەشىلىپ كەلەدى، اۋە قاتىناستارى دا دامۋ ۇستىندە. ديەۆالۆاتسيادان كەيىن تۋريستەر ءۇشىن اناعۇرلىم ارزان ەلگە اينالدىق. سوندا دا ساياحاتشىلاردىڭ تولاسسىز لەگىن كورىپ وتىرعان جوقپىز. سەبەبى، حالىق قازاقستاننىڭ تۋريستىك جەرلەرىنەن حابارسىز، قازاقستانعا ساياحاتتاۋعا بولاتىنىن بىلمەيدى. ءبىزدىڭ قازىرگى جۇمىسىمىز - سول اقپاراتتىق ۆاكۋمدى تولتىرۋ بولىپ وتىر. قازاقستان دەگەندە مۇناي مەن گازدى عانا ەلەستەتپەي، تۋريزمى دامىعان، بيزنەس جاساۋعا قولايلى ەل دەپ قابىلداۋلارى قاجەت»، - دەدى تيمۋر دۇيسەنعاليەۆ استانادا قازاقستاننىڭ ىسكەرلىك تۋريزمىنە ارنالعان جينالىستا.
كومپانيا وكىلىنىڭ ايتۋىنشا، سوڭعى ۋاقىتتا استانا مەن الماتى قالاسىنا كەلەتىن تۋريستەردىڭ سانى ارتقان جانە قازاقستاندا ىسكەرلىك تۋريزم مەن ەكوتۋريزمدى ءتيىمدى دامىتۋعا بولادى.
«ءبىر كەزدەرى قىرعىزستان مەن مەن وزبەكستانعا قاراعاندا، قازاقستانداعى دەمالىس قىمباتىراق بولاتىن. قازىر ءۇش ەلدىڭ باعاسى تەڭەستى. الماتىنىڭ بەسجۇلدىزدى قوناقۇيىندە توپتىق تاريف - 35 مىڭ تەڭگە. ياعني، 100 دوللارعا قالا ورتالىعىنداعى ەڭ ۇزدىك قوناقۇيدە دەمالۋعا بولادى. الاكولدە ءۇش مەزگىل تاماقتاندىراتىن شيپالى دەمالىس ايماقتارى - 8-12 مىڭ تەڭگە.
ساياحاتشىلار تاعى قاي جەردە 20-25 دوللارعا تولىققاندى دەمالا الادى؟ كوپتەگەن ساياحاتشى بۇل تۋرالى بىلمەيدى. قىزىلوردا وبلىسىنداعى جاڭاقورعاندا وتە تارتىمدى باعاعا تولىق ەمدەلىپ شىعۋعا بولادى. وسىنىڭ بارلىعىن تاۋارعا اينالدىرۋ كەرەك، قولايلى جاعداي جاساۋ كەرەك. ونىڭ ۇستىنە، قازاقستاننىڭ ورنالاسقان جەرى وتە ءتيىمدى. ەگەر وزبەكستان ەجەلگى قالالارىمەن مادەني تۋريزمنىڭ ورتالىعى اتانسا، قازاقستان - ىسكەرلىك جانە ەكوتۋريزمدى دامىتا الادى. سەبەبى، بيزنەس- تۋريست ورتا ەسەپپەن 300-500 دوللار قالدىراتىن ەڭ ءتيىمدى ساياحاتشى»، - دەدى ت. دۇيسەنعاليەۆ.
اۆتور: ايجان سەرىكجان قىزى
