پرەزيدەنت اتىراۋ وبلىسىنىڭ اكىمىنە قانداي كەڭەس بەردى

اتىراۋ. قازاقپارات - اتىراۋ وبلىسى وڭدەۋ سەكتورىنا باسا نازار اۋدارۋى قاجەت. بۇل تۋرالى مەملەكەت باسشىسى نۇرسۇلتان نازاربايەۆ اتىراۋ وبلىسىنىڭ الەۋمەتتىك- ەكونوميكالىق دامۋ ماسەلەلەرى جونىندە كەڭەستە ايتتى، دەپ حابارلايدى قازاقپارات ءتىلشىسى.

«وڭدەۋ سەكتورىنا باسا نازار اۋدارۋ قاجەت جانە سول جاققا ينۆەستيتسيانى باعىتتاعان ءجون. ال وبلىستا 2017 -جىلى اعىمداعى جىلمەن سالىستىرار بولساق، مۇنداي ينۆەستيتسيا كولەمى جارتى ەسەگە قىسقارىپ كەتكەن. سوندىقتان وڭدەۋ ونەركاسىبىنە ينۆەستورلاردى تارتۋ وتە قاجەت. مۇناي- حيميا كلاستەرىن دامىتۋ كەرەك. مۇناي- حيميا تەحنولوگياسىنىڭ قۇرىلىسىن اياقتاپ، ونىڭ اۋماعىندا مەن جۇرگىزىپ جاتقان ساياساتتىڭ ارقاسىندا ءقازىر پروپيلەن، پوليەتيلەن شىعاراتىن وندىرىستەردى ىسكە قوسايىق دەپ جاتىرمىز»، - دەپ اتاپ ءوتتى ەلباسى.

مەملەكەت باسشىسى ءوزىنىڭ شەتەلدىك ساپارلارى بارىسىندا ينۆەستورلاردى ەلىمىزدىڭ وڭدەۋ سالاسىنا شاقىراتىندىعىن ايتتى.

«مىسالى، ءبىز وتە كوپ اليۋميني شىعارامىز. ول قاجەت مەتالل. ءبىزدىڭ بوكسيتىمىز بار. ونى اليۋميني رەتىندە وڭدەمەي سىرتقا ساتاتىنبىز. قازىر مىنەكەي 250 مىڭ توننا تازا اليۋميني شىعاراتىن بولدىق. تاعى دا 250 مىڭ توننا شىعارايىق دەپ جاتىرمىز. ول اليۋمينيدەن نەشە ءتۇرلى زاتتار شىعارۋ ءۇشىن ارى قاراي وڭدەۋ قاجەت. ءبىز دۇنيەدە مىستى ەڭ كوپ ساتاتىن ەلمىز - 500 مىڭ توننا. مىستان كابەل دە، ىدىس تا، بارلىعى دا شىعادى. سونى جاساۋ كەرەك»، - دەدى مەملەكەت باسشىسى.

سونىمەن قاتار قازاقستان پرەزيدەنتى اتىراۋ وڭىرىندە پوليپروپيلەن ءوندىرىسىن جولعا قويۋعا 2,6 ميلليارد دوللار، پوليەتيلەنگە 4,6 ميلليارد دوللار جۇمسالاتىنىن ەسكە سالدى.

«ءبىرىنشىسى باستالدى، ەكىنشىسى باستالاتىن بولادى. ەلىمىزدەگى ءۇش مۇناي وڭدەۋ زاۋىتىن دا جاڭعىرتۋدى بىتىردىك. سوندىقتان بۇل سالادا ۇلكەن شارۋا جاسالدى. ارى قاراي جۇرە بەرۋ كەرەك. ەتانولعا سينگاپۋردان 2 ميلليارد دوللارعا جۋىق اقشا تارتىپ جاتىرمىز. فارماتسيەۆتيكا زاۋىتىنا 60 ميلليون دوللار، باسقا دا شارۋالارعا قارجى تارتىپ، وبلىستا وڭدەۋ سالاسى كوبەيگەن كەزدە تۇسەتىن قارجى دا ارتادى، ەلگە دە، وبلىسقا دا جاقسى بولادى. سول سەبەپتى وسىعان كوڭىل ءبولۋ كەرەك. ۇكىمەتپەن بىرگە جۇمىس ىستەۋلەرىڭىز كەرەك»، - دەدى نۇرسۇلتان نازاربايەۆ وبلىس باسشىسى نۇرلان نوعايەۆقا قاراتا.

ەلباسى مۇناي- گاز سالاسىندا تاۋارلاردى ءوندىرۋ جانە قىزمەت كورسەتۋ مۇمكىندىكتەرى مول ەكەندىگىن اتاپ ءوتتى. ماسەلەن، وتكەن جىلى مۇناي- گاز سەكتورىندا 3,3 تريلليون تەڭگە كولەمىندە ساتىپ الۋ ىسىندەگى قازاقستاندىقتاردىڭ ۇلەسى ءبىر عانا تريلليون بولعانىن ەسكەرتتى.

«بۇل نە دەگەن ءسوز؟ ەگەردە وسى زاتتاردى قازاقستاننان ساتىپ الاتىن بولسا، ونى جاسايتىن وندىرىستەردىڭ بارلىعى جۇمىس ىستەيدى. سول جەرگە ءبىزدىڭ ازاماتتارىمىز ورنالاسىپ، جالاقى الادى، جاعدايلارىن تۇزەيدى. سوندىقتان ءبىزدىڭ ۇلكەن ينۆەستورلارعا وسى ماسەلەنى ايتىپ وتىرۋ قاجەت»، - دەدى مەملەكەت باسشىسى.

اۆتور: مارلان جيەمباي