تالدىقورعاندا العاش رەت جۇرەكتىڭ قالقانشاسىنا جابىق ادىسپەن وپەراتسيا جاسالدى

تالدىقورعان. قازاقپارات - تالدىقورعاندا العاش رەت جۇرەك قالقانشاسىنىڭ تۋا بىتكەن اقاۋىنا جابىق ادىسپەن بىتەۋ وتاسى جاسالدى. ادەتتە مۇنداي كۇردەلى وپەراتسيا اشىق ادىسپەن ورىندالادى،

دەپ حابارلايدى قازاقپارات ءتىلشىسى.

تالدىقورعان قالاسىنداعى الماتى وبلىستىق كارديولوگيا ورتالىعىندا وككليۋدەر ارقىلى جۇرەك قالقانشاسىنداعى ساڭىلاۋدى ترانسكاتەتەرلى جابۋ ءادىسى بويىنشا شەبەرلىك ساعاتى ءوتتى. جەتىسۋلىق ارىپتەستەرىمەن تاجىريبە بولىسۋگە پەدياتريا جانە بالالار حيرۋرگياسى عىلىمي ورتالىعىنىڭ رەنتگەنو حيرۋرگى ازيز ونلاسىنوۆ كەلدى. مامان ەكى ناۋقاسقا وتا جاساپ، جاڭا ءادىستىڭ مۇمكىندىكتەرىنىڭ الدەقايدا ۇتىمدى ەكەنىن كورسەتتى. دارىگەردىڭ ايتۋىنشا، قالىپتى جاعدايدا مۇنداي وپەراتسيالار وتە ۇزاق جانە كۇردەلى تۇردە جاسالادى. «ەڭ الدىمەن ناۋقاس جالپى ناركوز ارقىلى ۇيىقتاتىلادى. ونىڭ كەۋدە قۋىسى اشىلىپ، جۇرەكتىڭ جۇمىسى ۋاقىتشا توقتاتىلىپ سودان كەيىن ساڭىلاۋدى تىگۋ ارقىلى جامايتىنبىز. ال وككليۋدەرمەن تامىر ارقىلى جۇرەك قالقانشاسىنىڭ ساڭىلاۋىن بىتەۋ الدەقايدا جىلدام»، - دەيدى ازيز ونلاسىنوۆ.

مۇنداي ادىستەن كەيىن ناۋقاس بىردەن وڭالىپ، قالىپتى ومىرىنە تەز ورالادى. الماتى جانە استانا قالالارىندا وپەراتسيانىڭ بۇل ءتۇرى تۇراقتى جاسالىپ كەلەدى.

«قازىر ماماندار ابدەن ماشىقتانىپ، وڭىرلەردەگى ارىپتەستەرىن ۇيرەتۋدە»، - دەيدى كارديولوگيا ورتالىعىنىڭ باس دارىگەرى راحىمبەردى سۇلتانبەكوۆ. جەتىسۋ ءوڭىرى باس كارديولوگىنىڭ ايتۋىنشا، ورتالىقتا ءبىر جىلدا 200 دەن استام وتا جاسالادى. ونىڭ 25 پايىزى تۋا بىتكەن جۇرەك اقاۋلارى.

اۆتور: سامال قابىشيەۆا