نۇرسۇلتان نازاربايەۆ: مەن قازاقستاندىق كوستيۋممەن، سەندەر بريونيمەن وتىرسىڭدار

اتىراۋ. قازاقپارات - اتىراۋ وبلىسىنىڭ الەۋمەتتىك- ەكونوميكالىق دامۋ ماسەلەلەرى جونىندە كەڭەستە مەملەكەت باسشىسى نۇرسۇلتان نازاربايەۆ قازاقستاندىقتاردى وتاندىق جەڭىل ونەركاسىپ ونىمدەرىن الۋعا شاقىردى، دەپ حابارلايدى قازاقپارات ءتىلشىسى.

«ءبىز وسى جىلداردىڭ ىشىندە وتاندىق جەڭىل ونەركاسىپتى جوعالتىپ الدىق. وزىمىزدە تىگىلەتىن كوستيۋدى قانشا كيىپ جۇرسەم دە، بارلىقتارىڭ مىنا جەردە بريونيمەن وتىرسىڭدار. قازاقستاندا تىگىلەتىن كوستيۋمدەر ودان جامان ەمەس»، - دەدى نۇرسۇلتان نازاربايەۆ.

مەملەكەت باسشىسى يتاليالىق بۇل برەند 5-6 مىڭ دوللار بولسا، قازاقستاندىق ءونىم ودان بىرنەشە ەسە ارزان ەكەندىگىن ءارى كيۋگە دە بولاتىنىن باسا ايتتى.

«مەن سەندەرگە ايتايىن، ءبىز قازاقپىز عوي. جاس كەزىمىزدە اش-جاڭالاش ءجۇرىپ وستىك. كورمەگەندى كوردىك، ءبىزدىڭ اكە-شەشەلەرىمىز تۇك كورگەن جوق. تۇك كورمەگەندىكتەن قالتامىزعا اقشا ءتۇسىپ ەدى، بارلىعىمىز ءداۋ ماشينا الدىق، ءۇش قاباتتى ءۇي سالدىق. قازىر سول جىگىتتەر ۇيلەرىن نە ىستەرىن بىلمەي، ساتا الماي ءجۇر. 3-4 قاباتتى ۇيگە ەكى بالاسىمەن تۇرۋ دەگەن قانداي ماسقارا. ونى كۇندە تازالاۋ كەرەك، قارايتىن ادام كەرەك. باستاپقى كەزدە سولاي جاسادىق. باتىستا باي ادامدار ءوزىنىڭ باي ەكەنىن ەلدىڭ الدىندا كورسەتپەيدى. ناعىز باي ادامدار سولاي بولادى. ال بىزدىكى «مەنىڭ ماشينام انانىكىنەن جاقسى، ءۇيىم بيىك» دەپ كورسەتۋى كەرەك. بۇل ناعىز ساۋاتسىزدىق سانالادى. «ۇلىق بولساڭ، كىشىك بول»، دەپ قازاق نەلىكتەن ايتقان؟ بايلىقتى بىرەۋ كورەدى، بىرەۋ كورە المايدى»، - دەدى ەلباسى.

نۇرسۇلتان نازاربايەۆ بۇگىنگى قازاقتىڭ بايلارى مەملەكەت جۇرگىزىپ وتىرعان ساياساتتىڭ ارقاسىندا داۋلەتتى بولعانىن ايتتى. سونىمەن قاتار ولاردى تۋعان اۋىلدارىن بارىپ الەۋمەتتىك نىساندار سالۋعا قارجى سالۋعا ۇندەدى.