ەلباسى اتىراۋ وبلىسىنىڭ دامۋ ماسەلەلەرى جونىندە كەڭەس وتكىزۋدە
«مەن قابىلدانعان باعدارلامالاردىڭ قالاي جۇزەگە اسىرىلىپ جاتقانىن تەكسەرىپ، ەسەپ الدىم. حالىقپەن ارالاسىپ، كوڭىل- كۇيلەرىمەن تانىستىم. سونىڭ بارلىعىن ايتقان كەزدە، جالپى جۇمىس ءجۇرىپ جاتىر، باعدارلامالار ورىندالۋدا. تاۋەلسىزدىك جىلدارى ىشىندە اتقارعان جۇمىستار كوپ. ونى ايتىپ ءجۇرمىن، وزدەرىڭىز دە بىلەسىزدەر. قازاق دەگەن حالىق بۇرىن- سوڭدى بولماعان جەتىستىكتەرگە جەتتى»، - دەدى كەڭەستى اشقان ەلباسى.
مەملەكەت باسشىسى بۇگىندە قازاقستاندى بۇكىل الەم ەلدەرى تانىپ، سىيلايتىندىعىن، سوندىقتان ەلىمىز بىتىمگەرشىلىكپەن دە شۇعىلداناتىنىن اتاپ ءوتتى.
«بىزدە دۇنيەجۇزىلىك دىندەر كوشباسشىلارىنىڭ التىنشى سيەزى وتەيىن دەپ جاتىر. نەلىكتەن ول بىزدە وتەدى؟ تىنىشتىق بولعاننان كەيىن، قازاقستانعا سەنىم بولعاننان كەيىن وتەدى. بۇكىل ت م د مەملەكەتتەرىنىڭ اراسىندا تۇڭعىش رەت ءبىز ب ۇ ۇ قاۋىپسىزدىك كەڭەسىنىڭ مۇشەسى بولىپ، ءوزىمىزدىڭ ويىمىزدى، پىكىرىمىزدى بۇكىل دۇنيەگە پاش ەتكىزىپ جاتىرمىز. مەن بارىپ ءتوراعالىق جاسادىم. ونى دا بىلەسىزدەر»، - دەپ اتاپ ءوتتى نۇرسۇلتان نازاربايەۆ.
وسى ورايدا قازاقستان پرەزيدەنتى اتالعان بارلىق شارۋالاردى اتقارۋدا اتىراۋلىق ازاماتتاردىڭ، وتانداستارىمىزدىڭ ىستەگەن ءىسى قىرۋار ەكەندىگىن ەسكە سالدى. اتىراۋ قۇرمانعازى، دينا، ماحامبەت، مۇرات سىندى بەلگىلى ازاماتتار دۇنيەگە كەلگەن ءوڭىر ەكەندىگىن اتاپ ءوتتى.
اۆتور: مارلان جيەمباي
