جاڭبىر ادامى
قازىرگى كۇنى داڭقتى اكتەرلەرگە اينالعان توم كرۋز بەن داستين حوففمان فيلمدەگى باستى رولدەردى سومداپ شىقتى. فيلمگە قاتىستى ءتۇرلى دەرەكتەردى اقتارا بەرسەك، ءبىر- بىرىنەن اسىپ تۇسەدى. فيلمدە جاس كاسىپكەر چارلي بەببيتت اكەسى قايتىس بولعان سوڭ ونىڭ بۇكىل بايلىعى ءىنىسى رەيموند بەببيتتكە قالدىرىلعانىن بىلەدى. بۇل كەزدە اۋتيزمگە شالدىققان رەيموند ەسى اۋىسقانداردى ەمدەيتىن اۋرۋحانادا جاتقان ەدى. چارلي كوپ ويلانباي ءىنىسىن اۋرۋحانادان الىپ كەتىپ، اكەسىنەن قالعان مۇرانىڭ جارتىسىن الىپ قالۋدى كوزدەيدى.
فيلم بارىسىندا چارلي رەيموندتىڭ اۋتيزمىنە قاراماستان ونىمەن ەرەكشە ءتىل تابىسىپ كەتەدى. توم كرۋز فيلمدە كوبىنە چارليمەن اڭگىمەلەسەتىندىكتەن ول فيلمگە دەيىن ەسى اۋىسقانداردى ەمدەيتىن اۋرۋحانادا اۋتيستەرمەن اڭگىمە ايتىپ، ساۋىق قۇرىپ دايىندالعان ەكەن. رەيموند اسا قابىلەتتى ادام رەتىندە كورسەتىلەدى. ونىڭ ماتەماتيكالىق ويلاۋ جۇيەسى، ەستە ساقتاۋ قابىلەتى ماشينالدى دەڭگەيدە بولادى. بۇنداي دارىنى چارليگە تىعىرىقتان شىعۋعا كومەكتەسەدى. ول رەيموندپەن بىرگە لاس- ۆەگاستاعى كازينولاردا اقشا ۇتىپ الادى. ويىن كەزىندەگى رەيموندتىڭ ەسەپكە جۇيرىكتىگى، ىقتيمالدىق نۇسقالارىن سارالاي ءبىلۋى كازينو يەلەرىن ءبىراز شىعىنعا ۇشىراتادى. رەيموندتىڭ بۇل قابىلەتى - جيناقتالعان وبراز.
كيم پيك رەيموند پروتوتيپتەرىنىڭ ءبىرى - امەريكالىق كيم پيك. بۇل ادام ايرىقشا جادقا يە بولعان. ول ءوزى وقىعان كىتاپتىڭ %98 ىن سوزبە- ءسوز ەستە ساقتاعان. سونداي- اق ول كىتاپ وقۋدىڭ تاڭعاجايىپ تەحنيكاسىن مەڭگەرگەن. ءبىر كوزىمەن كىتاپتىڭ ءبىرىنشى بەتىن وقىپ وتىرسا، ەكىنشى كوزىمەن ەكىنشى بەتىن قاتار وقيتىن بولعان. كىتاپتىڭ ەكى بەتىن وقۋ ونىڭ تەك 8-10 سەكۋند ۋاقىتىن العان ەكەن. كيم اۋتيزمگە شالدىقپاعان، الايدا ونىڭ ميىندا كۇستى دەنە بولماعان جانە ميشىعى زاقىمدانعان.
«جاڭبىر ادامىنداعى» قىزىق ەپيزودتىڭ ءبىرى - رەيموندتىڭ Qantas اۋە كومپانياسىن تالاپ ەتۋى. ونىڭ ايتۋىنشا، بۇل اۋە كومپانياسىنىڭ ۇشاقتارى ەشقاشان اۋە اپاتىنا ۇشىراماعان ەكەن. بۇل ەپيزودتى كوپتەگەن اۋە كومپانيالارى جولاۋشىلارعا ۇسىنىلاتىن فيلمدەردەگى نۇسقادان الىپ تاستاعان. ونى تەك Qantas كومپانياسى عانا قالدىرىپتى. بۇل فيلمدى ستيۆەن سپيلبەرگ تۇسىرمەك بولادى، الايدا ءتۇرلى سەبەپپەن ونىڭ جوسپارى وزگەرىپ، «جاڭبىر ادامىن» بارري ليەۆينسون ءتۇسىرىپ شىعادى. بارري ءوز ويىنداعى كارتينانى جاساپ شىققانداي بولدى. ارتىعىن الىپ تاستاپ، قوسارىن قوستى. الايدا فيلمنىڭ نەگىزگى جەلىسىنە رەجيسسەردىڭ عانا سەپتىگى تيمەيدى. ءفيلمنىڭ ستسەنارييىن جازعان بەرري مورروۋ مەن رونالد بەسستەردىڭ سيۋجەتتىك جەلىسىنە وزگەرىس ەنگىزىلدى. رەجيسسەرگە داستين حوففمان ۇسىنىس ايتادى.
فيلم سوڭىندا رەيموند اۋرۋحاناعا قايتا ورالىپ، چارليمەن قوشتاسادى. باستاپقى ستسەنارييدە رەيموند اعاسىمەن بىرگە قالۋى ءتيىس بولعان، الايدا ءداستيننىڭ ويىنشا، مۇنداي كورىنىس شىنايى كورىنبەي قالادى ەكەن. ونىڭ تالابى بويىنشا، رەيموند اعاسىمەن قوشتاسادى. رولگە جان- تانىمەن ەنۋ وسىلاي بولۋى كەرەك شىعار.
Massaget.kz
