استانادا وقۋشىلار قىستا دا دالادا فۋتبول ويناي بەرەتىن بولادى - اسەت يسەكەشيەۆ

استانا. قازاقپارات - استانا قالاسىنىڭ اكىمى اسەت يسەكەشيەۆ جابىق سپورت الاڭدارىن سالۋ جوسپارى جايىندا ايتىپ بەردى ، دەپ حابارلايدى قازاقپارات ءتىلشىسى.

«بۇگىندە استانا «سالاۋاتتى قالالار» اتتى حالىقارالىق جوباعا قاتىسىپ كەلەدى. وسىعان وراي، مەملەكەتتىك- جەكەشەلىك سەرىكتەستىك نەگىزىندە جابىق سپورت الاڭدارىن سالۋ جۇمىستارى اتقارىلۋدا. ءبارىمىز جاقسى بىلەمىز، ءبىزدىڭ كليماتىمىز سونداي، ءبىراز ۋاقىت سۋىق بولىپ تۇرادى. سول سەبەپتى ءبىز مەكتەپتەردىڭ جانىنداعى سپورت الاڭدارىن جاۋىپ تاستاۋدى جوسپارلاپ وتىرمىز. وسىنىڭ ارقاسىندا مەكتەپ وقۋشىلارى قىستا دا سپورتپەن اينالىسا الادى»، - دەدى ءا. يسەكەشيەۆ ءبىلىم باسقارماسىنىڭ ۇيىمداستىرۋىمەن وتكەن تامىز كونفەرەنسياسىندا.

اكىمنىڭ ايتۋىنشا، بيىل 59- مەكتەپتىڭ جانىنان پيلوتتىق نەگىزدە ءبىر جابىق سپورت الاڭى اشىلدى. جاقىن ارادا تاعى 30 مەكتەپ بويىنشا كونكۋرس جاريالانادى. سونىڭ قورىتىندىسى بويىنشا اتالعان مەكتەپتەردە دە جابىق سپورت الاڭدارى سالىنادى.

«قازىرگى كەزدە باسقا قالالاردا ءبىر مەكتەپكە شامامەن 800-1500 وقۋشى كەلەدى. ال ەلوردادا اتالعان كورسەتكىش 1500-گە جەتىپ وتىر. الداعى بەس جىلدا استاناعا تاعى 120 مىڭنان استام وقۋشى كەلەدى دەگەن بولجام بار. 2011 -جىلى ەلوردا مەكتەپتەرىندە 75 مىڭ وقۋشى وقىسا، بىلتىر اتالعان كورسەتكىش 140 مىڭعا جەتتى. بيىل 155 مىڭ وقۋشى بولادى دەپ وتىرمىز. وسىعان بايلانىستى الداعى بەس جىلدا مەملەكەتتىك بيۋدجەتتىڭ ەسەبىنەن 24 مەكتەپ سالىنادى»، - دەپ اتاپ كورسەتتى ءا. يسەكەشيەۆ.

اۆتور: ارمان اسقاروۆ