سولتۇستىك كورەيا قىتايمەن شەكارادا قۇرىلىس قارقىنىن ارتتىردى

  استانا. قازاقپارات - سولتۇستىك كورەيانىڭ قۇرىلىسشى سولداتتارى مەملەكەتتىڭ مەرەيتويىنا دەيىن قىتايمەن شەكارالاس ورنالاسقان قالالاردىڭ بىرىندە قارقىندى قۇرىلىس جۇمىستارىن جۇرگىزىپ جاتىر.

 ولار سولتۇستىكتەگى بۇل قالادا ۇكىمەتتىك عيماراتتار مەن كوپقاباتتى تۇرعىن ۇيلەر سالۋدا، دەپ حابارلايدى Associated Press باسىلى.

سولتۇستىك كورەيانىڭ 70 جىلدىق مەرەيتويى قارساڭىندا جۇرگىزىلىپ جاتقان جالپى ۇلتتىق باعىتتاعى نەگىزگى جۇمىستاردىڭ ءبىرى - قارقىندى قۇرىلىس. سولتۇستىك كورەيا باسشىسى كيم چەن ىن بۇل ءۇردىستى مەملەكەتكە قارسى كەلەتىندەردىڭ كەز كەلگەنىمەن كۇرەسۋدىڭ سيمۆوليكالىق بەلگىسى رەتىندە اتاعان بولاتىن.

كيم چەن ىن 2011 -جىلدىڭ سوڭىندا بيلىككە كەلدى. سول كەزدە- اق ول اسكەريلەرمەن بىرگە كوپ حالىق جينالعان ستاديوندا تۇرىپ عيماراتتار سالىپ، جولدار جاقسارتىلاتىنىن، ينفراقۇرىلىمنىڭ ارتاتىنىن ايتقان ەدى. ءبىراق سول كۇننەن بەرى حالىق ەشقانداي وزگەرىستى كورمەدى.

كيمنىڭ بيلىك باسىنا كەلگەندەگى بەرگەن ۋادەلەرىنىڭ دە ەڭ نەگىزگىسى قۇرىلىستى ارتتىرىپ، حالىقتىڭ ءومىر ءسۇرۋ جاعدايىن جاقسارتۋ بولعان ەدى. سونداي- اق ول ەكونوميكانى قارقىندى دامىتۋ تۋرالى دا ايتقان بولاتىن. دەگەنمەن، ونىڭ بيلىگى كەزىندە ا ق ش حالىقارالىق سانكتسيالاردى ارتتىرىپ، يادرولىق قارۋدان باس تارتۋدى تالاپ ەتىپ، مەملەكەتتىڭ ەكونوميكاسىن قىسپاققا العانى تاعى بار.

وتكەن اپتادا كيم چەن ىن وسى ايتقان سوزدەرىن قايتا قايتالادى. مەملەكەتتىك بۇقارالىق اقپارات قۇرالدارىنىڭ ايتۋىنشا، ول قارسى تاراپتاردىڭ سانكتسيالارى مەملەكەتكە كەدەرگى كەلتىرىپ جاتقانىن اتاپ وتكەن. سونىمەن قاتار سولتۇستىك كورەيا حالقى ءۇشىن بۇل ۇلكەن پروبلەماعا اينالعانىن ايتقان.

«الەۋمەتتىك وركەنيەتتى باسىپ تاستاۋعا تىرىسىپ جاتقاندارعا قارسى سيمۆوليكالىق كۇرەس رەتىندە ءبىز قۇرىلىس قارقىنىن ارتتىراتىن بولامىز» ، دەدى كيم چەن ىن.

ونىڭ ايتۋىنشا، پەكتۋ تاۋىنىڭ بوكتەرىندە، قىتايمەن شەكارادا ورنالاسقان كىشكەنتاي قالا ءوزىنىڭ وتباسىمەن تىعىز بايلانىستى ءارى ول سولتۇستىك كورەيا ريەۆوليۋتسياسىنىڭ ورتالىعى سانالادى.

دەگەنمەن، بۇل جەردەگى قۇرىلىس اۋىر جاعدايدا جۇرگىزىلىپ جاتىر. مۇندا اۋىر تەحنيكا ەنگىزۋ قيىنعا سوعاتىندىقتان، قۇرىلىسشىلار اۋىر جۇمىس ىستەۋدە. جۇمىسشىلار بارلىق قيىن جۇمىستى قولمەن، اعاش قۇرالدارمەن جانە كۇرەكتەرمەن ىستەۋگە ءماجبۇر.

 دەگەنمەن، قۇرىلىس جۇمىستارى بۇل كىشكەنتاي قالانى فەرمالارمەن قورشاپ، تىرشىلىكتى جانداندىرا ءتۇستى. سولتۇستىك كورەيا ۇكىمەتىنىڭ ايتۋىنشا، بۇل مەملەكەت بويىنشا بولاشاق دامۋ جوبالارىنىڭ ۇلگىسىنە اينالماق.

ايتا كەتۋ كەرەك، بۇدان باسقا چوڭجيىڭ قالاسىندا 20 قاباتتى تۇرعىن ءۇي، ۆونساندا تۋريزمگە قاجەتتى ينفراقۇرىلىمدار مەن وبەكتىلەر سالىنىپ جاتىر. سونداي- اق ۆونساندا حالىقارالىق كەلۋشىلەردى تارتاتىپ اۋەجاي ىسكە قوسىلادى دەپ كۇتىلۋدە.

سولتۇستىك كورەيا قىتايمەن شەكارادا قۇرىلىس قارقىنىن ارتتىرعاندىقتان، كورشى مەملەكەتتەن كەلۋشى بيزنەسمەندەر مەن تۋريستەر سانى دا ارتىپتى. ال وڭتۇستىك كورەيانىڭ رەسمي وكىلدەرى سولتۇستىككە جول مەن تەمىر جول سالۋ جۇمىسىن جاقسارتۋعا قول ۇشىن سوزباق.

قايتكەنمەن دە، كيم چەن ىن الدىعا قاراي دامۋعا دايىن ەكەنىن كورسەتتى. كوپتەگەن جاقسى جاڭالىقتار مەن جۇمىستار 9 - قىركۇيەكتە اياقتالاتىنىمەن، قۇرىلىستىڭ ارتۋى ونىڭ جوسپارىنىڭ بولاشاققا باعىتتالعانىن كورسەتسە كەرەك. سەبەبى كەيبىر عيماراتتاردىڭ قۇرىلىسىنا ءالى دە ۋاقىت كەرەك.

Baq.kz