بيىل قازاقستاندا شەتەل ازاماتتارىن وقىتۋعا قانشا گرانت ءبولىندى؟
«قازاقستان رەسپۋبليكاسى ۇكىمەتىنىڭ 2018-جىلعى 16- ساۋىردەگى قاۋلىسىنا سايكەس، بيىلعى وقۋ جىلىنا حالىقارالىق كەلىسىمدەر بويىنشا شەتەل ازاماتتارىن وقىتۋعا 140 گرانت ءبولىندى»، - دەلىنگەن مينيسترلىكتىڭ مالىمەتىندە.
بۇدان بولەك، ەلىمىزدە 2018-2019 وقۋ جىلىنا بولىنگەن مەملەكەتتىك ءبىلىم بەرۋ تاپسىرىسىنىڭ جالپى كولەمى 69089 ورىندى قۇرايدى. ونىڭ ىشىندە 53594 ءى جوعارى ءبىلىم الۋ ءۇشىن، 13220 - ماگيستراتۋراعا، 2275 - PhD دوكتورانتۋراعا.
«مەملەكەتتىك ءبىلىم بەرۋ تاپسىرىسىن قالىپتاستىرۋدا تەحنيكالىق جانە تەحنولوگيالىق ماماندىقتار بويىنشا ماماندار دايارلاۋعا باسا نازار اۋدارىلدى. اتالعان ماماندىقتار تۇرعىسىندا بارلىعى 25237 گرانت ءبولىندى. بۇل رەتتە تەحنيكالىق ماماندىقتار بويىنشا اقپاراتتىق تەحنولوگيالار، روبوتوتەحنيكا، نانو- تەحنولوگيا سالاسىندا ينجەنەر مامانداردى دايارلاۋعا، سونداي-اق پەداگوگيكالىق ماماندىقتار، ونىڭ ىشىندە كۇشەيتىلگەن تىلدىك قۇزىرەتتىلىگى بويىنشا پەداگوگ ماماندار دايارلاۋعا باسىمدىق بەرىلدى»، - دەپ ناقتىلادى ۆەدومستۆو باسپا ءسوز قىزمەتى.
