حالىقارالىق رەيتينگتەر قازاقستانعا نە ءۇشىن قاجەت - ساراپشى جاۋابى
«الەم بويىنشا ەلدىڭ دامۋىن كورسەتەتىن نەگىزگى بارومەترلەردىڭ ءبىرى - ەلدەگى بيزنەستىڭ دامۋ دەڭگەيى بولىپ سانالادى. سوندىقتان، قازاقستان بايگەگە ءتۇسىپ وتىرعان ۇلكەن حالىقارالىق رەيتينگتەر ەلدە قالىپتاسقان الەۋمەتتىك- ەكونوميكالىق جاعدايدى كاسىپكەرلەرىمىزدىڭ پىكىرى ارقىلى انىقتايدى. جالپى، بىزگە باسەكەگە قابىلەتتىلىكتى باعالايتىن رەيتينگتەر نە ءۇشىن كەرەك؟ بۇل رەيتينگتەر ءبىزدىڭ ەلدىڭ باسقا ەلدەمەن سالىستىرعانداعى دامۋ دەڭگەيىن كورسەتەدى. قازاقستان 2030-جىلعا دەيىنگى ستراتەگياسىن جاريالاعان ساتتەن باستاپ، الەمدەگى الپاۋىت ەلدەرمەن بايگەگە تۇسكەنىن بىلەمىز. ءبىزدىڭ ماقسات - الەۋمەتتىك جاعدايى، ءومىر ءسۇرۋ ساپاسى جاقسىراق ەلدەردىڭ دەڭگەيىنە جەتۋ، حالىقتىڭ ءومىر ءسۇرۋ ساپاسىن جاقسارتۋ. سونىمەن بىرگە، حالىقارالىق رەيتينگتەر - ەلگە ينۆەستيتسيا تارتۋدىڭ قۇرالى»، - دەدى باقىتگۇل قامبار استانا اكىمدىگىندە وتكەن «باسەكەگە قابىلەتتى بيزنەس - باسەكەگە قابىلەتتى ەكونوميكا» كەزدەسۋىندە.
ونىڭ ايتۋىنشا، جاھاندىق باسەكەگە قابىلەتتىلىكتى باعالايتىن رەيتينگكە 130 ەل قاتىسادى. ال شۆەيتساريانىڭ لوزاننا قالاسىنداعى حالىقارالىق دامۋ ينستيتۋتى وتكىزەتىن IMD رەيتينگىنە - الدىڭعى قاتارلى دامىعان 60 ەل عانا قاتىسا الادى.
«2008-جىلى ەكونوميكالىق زەرتتەۋلەر ينستيتۋتى شۆەيتسارياداعى حالىقارالىق مەنەدجمەنتتى دامىتۋ ينستيتۋتىنىڭ رەسمي سەرىكتەسى اتاندى. سوندىقتان، جىل سايىن رەسمي سەرىكتەس رەتىندە ءبىز قازاقستاننىڭ رەيتينگكە قاتىسۋىنا قولداۋ كورسەتەمىز. ال قازاقستان ءۇشىن بۇل رەيتينگتەردىڭ قاجەتتىلىگى قانداي؟ ءوزىڭىز دە كەز كەلگەن مەملەكەتتە جۇمىس ىستەۋ ءۇشىن الدىمەن سىبايلاس جەمقورلىقتىڭ دەڭگەيىنە قارايسىز. سىبايلاس جەمقورلىق دەڭگەيىن انىقتاۋ ءۇشىن حالىقارالىق اگەنتتىكتەر وزگە رەيتينگتەردەن مالىمەت الادى. سونداي مالىمەت الاتىن رەيتينگتەردىڭ ءبىرى - IMD. سوندىقتان، بۇل رەيتينگتەرگە قاتىسۋ ءبىز ءۇشىن ماڭىزدى، ونسىز ەلدەگى وبەكتيۆتى جاعدايدى كورە المايمىز»، - دەپ تولىقتىردى باقىتگۇل قامبار.
قازىرگى ۋاقىتتا قازاقستان اتالعان رەيتينگتە ۇكىمەت قىزمەتىنىڭ تيىمدىلىگى بويىنشا 25- ورىندا، ەكونوميكالىق قىزمەت جونىندەگى فاكتوردا - 40- ورىندا تۇر. بۇل ناتيجەلەرگە قاراپ، مەملەكەت ساياساتىنىڭ، ستراتەگياسىنىڭ باعىتىن انىقتاۋعا بولادى.
«جىل سايىن ورتا ەسەپپەن 700 كاسىپورىندى قامتيتىن دەرەكقور توپتاستىرىپ، لوزاننا ينستيتۋتىنا جىبەرەمىز. ولار ەشقانداي ۇيىمدى اراعا سالماي، تىكەلەي كاسىپورىندارعا سۇراقتار سىلتەمەسىن جىبەرەدى. بۇل ساۋالناماعا 700 كاسىپورىننىڭ جۇزدەن استامى عانا جاۋاپ بەرەدى. ارينە، كاسىپكەرلەردىڭ ۋاقىتى تىعىز ەكەنىن تۇسىنەمىز. الداعى ۋاقىتتا كاسىپورىنداردى باعالاۋعا بەلسەندى قاتىسۋعا شاقىرامىن. ويتكەنى، سىزدەردىڭ بەرگەن باعالارىڭىز ارقىلى ەلدەگى ەكونوميكالىق- الەۋمەتتىك جاعدايعا باعا بەرەدى»، - دەيدى باقىتگۇل قامبار.
