ناتو پۋتيننىڭ «رەسەيگە قاۋىپ ءتوندى» دەگەنىن جوققا شىعاردى

 استانا. قازاقپارات - ناتو رەسەي پرەزيدەنتى ۆلاديمير پۋتيننىڭ شىعىس ەۋروپاداعى اليانس كۇشتەرى رەسەيگە قاۋىپ توندىرەدى دەگەن مالىمدەمەسىن تەرىستەدى.

Reuters اگەنتتىگىنىڭ حابارلاۋىنشا، ۇيىم باسپا ءسوز حاتشىسى وانا لۋنگەسكۋ ناتو «قورعانۋ ماقساتىندا» ارەكەت ەتىپ جاتقانىن جانە ول حالىقارالىق قۇقىققا تولىق ساي كەلەتىنىن ايتتى.

ناتو وكىلىنىڭ سوزىنشە، رەسەيمەن شەكارالاس ەۋروپا ەلدەرىندە ورنالاسقان ءتورت مىڭ اسكەري قىزمەتكەر ماسكەۋدىڭ ايماقتاعى اسكەرىنىڭ سانىنا تەڭ كەلمەيدى. وانا لۋنگەسكۋ «رەسەي ۋكراينا، گرۋزيا جانە مولدوۆادا بۇل ەلدەر بيلىگىنىڭ ەركىنەن تىس اسكەر ۇستاپ وتىرعانىن» ايتتى.

وانا لۋنگەسكۋ ۆلاديمير پۋتيننىڭ ناتو اسكەري ۇشاقتاردىڭ ءۇشۋ ەرەجەسىن تالقىلاعىسى كەلمەيدى دەگەن تۇجىرىمىن جوققا شىعاردى. ونىڭ سوزىنشە، مۇنداي ماسەلە رەسەي - ناتو سامميتىندە كوتەرىلگەن.

بۇعان دەيىن ر ي ا «نوۆوستي» پۋتيننىڭ «ناتو ينفراقۇرىلىمى رەسەيمەن شەكاراعا جاقىنداپ كەلەدى» دەگەن ءسوزىن جاريالاعان ەدى. پۋتين اليانس ماسكەۋمەن اسكەري ۇشاقتار قوزعالىسى ماسەلەسىن تالقىلاعىسى كەلمەيدى دەپ مالىمدەگەن.

رەسەي 2014-جىلى قىرىم تۇبەگىن اننەكسيالاپ العان سوڭ ناتو ليتۆا، لاتۆيا، ەستونيا جانە پولشاعا ءتورت مىڭ اسكەري قىزمەتكەر ورنالاستىرعان. بۇل اسكەر رەسەيمەن سوعىس بولا قالعان جاعدايدا وداقتاستاردىڭ نەگىزگى كۇشى جەتكەنشە قارسىلاسقا تويتارىس بەرە تۇرادى دەپ جوسپارلانعان.

«ازاتتىق»