قازاقستاندا ۋكراينالىق تەلەارنالار اشىلۋى مۇمكىن

استانا. قازاقپارات - ۋكراينانىڭ قازاقستانداعى توتەنشە جانە وكىلەتتى ەلشىسى يۆان كۋلەبا ۋكراينالىق تەلەارنالاردى اشۋعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«قازاقستانداعى ۋكراين دياسپوراسى ءوز ەلىنىڭ تەلەارنالارىن كورە الماي ءجۇر. ءبىز وسى سالادا جۇمىس ىستەپ جاتىرمىز. وكىنىشكە قاراي، قازىرگى كەزدە قازاقستان جەرىندە ۋكراين تىلىندە بىردە- ءبىر ارنا، بىردە- ءبىر باعدارلاما جوق. وسىعان بايلانىستى مەن كابەلدى جەلىلەردىڭ يەلەرىنە حات جولداپ، بەيتاراپ ۇستانىمى بار كەز كەلگەن ارنانى قوسۋدى سۇرادىم. اقپاراتتىق ارنا بولسا دا جەتكىلىكتى»، - دەدى ي. كۋلەبا جۋرناليستەرگە بەرگەن سۇحباتىندا.

ەلشىنىڭ سوزىنە قاراعاندا، رەسمي مالىمەت بويىنشا قازاقساندا 300 مىڭ ۋكراين تۇرادى. ءبىراق ولاردىڭ سانى ودان دا كوپ بولۋى ابدەن مۇمكىن.

«ءبىز استانادا مادەنيەت كۇندەرىن وتكىزۋدى كوزدەيمىز. بۇدان بولەك، استانالىقتارعا تاراس شيەۆچەنكونىڭ ەسكەرتكىشىن سىيلاۋدى جوسپارلاپ وتىرمىز»، - دەپ اتاپ كورسەتتى ي. كۋلەبا.

ايتا كەتەيىك، بۇگىن اقوردادا ق ر پرەزيدەنتى نۇرسۇلتان نازاربايەۆ بەس ەلدىڭ ەلشىسىنەن سەنىم گراموتالارىن قابىلدادى.

سول جەردە مەملەكەت باسشىسى ەل ەكونوميكاسىنىڭ دامۋى تۋرالى ايتىپ بەردى.

اۆتور: ارمان اسقاروۆ