بالانى مەكتەپكە ورنالاستىرۋدا تۇراقتى تىركەۋ كەرەك پە؟

استانا. قازاقپارات - بالانى مەكتەپكە ورنالاستىرۋ ءۇشىن تۇرعىلىقتى مەكەن-جايى بويىنشا تۇراقتى تىركەۋ كەرەك پە؟ بۇل سۇراققا ق ر ۇكىمەتىنىڭ باسپا ءسوز ورتالىعىندا ق ر ءبىلىم جانە عىلىم ۆيتسە-ءمينيسترى اسحات ايماعامبەتوۆ جاۋاپ بەردى، دەپ حابارلايدى قازاقپارات ءتىلشىسى.

«بالانى مەكتەپكە قابىلداۋ تۋرالى ايتارىم - بۇل جەردە تەك زاڭعا سۇيەنە وتىرىپ شەشىم قابىلداۋ كەرەك. بىزدە ءبىلىم تۋرالى زاڭ، ۇكىمەتتىڭ 128-قاۋلىسى بويىنشا «بالانى قابىلداۋدىڭ تيپتىك قاعيداتتارى» بار. مىنە، وسى تيپتىك ەرەجەلەردە اتا-انالاردىڭ ءسىز ايتقان قۇجاتتى (تۇراقتى تىركەۋ انىتاماسى - اۆت) وتكىزۋى ءتيىس ەكەنى تۋرالى جازىلماعان. تۇراقتى تىركەۋ دەمەك، تالاپ ەتىلمەيدى. سوندىقتان، ءبىز استانادا مۇنداي تالاپتاردىڭ دۇرىس ەمەس ەكەنىن ايتتىق. بالالار مەن اتا-انالار ءوز تالاپ-تىلەگى بويىنشا كەز كەلگەن ءبىلىم بەرۋ ۇيىمىنا بەرە الادى. ەكىنشىدەن، استانادا مەكتەپتەردە ورىن تاپشىلىعى ماسەلەسى بار ەكەنىن بىلەسىزدەر. سوندىقتان، وسى ماسەلەنى ەسەپكە الۋ كەرەك»، - دەدى اسحات ايماعامبەتوۆ.

ايتا كەتەرلىگى، بۇدان بۇرىن ۇكىمەت وتىرىسىندا بايانداما جاساعان ءبىلىم جانە عىلىم ءمينيسترى ەرلان ساعاديەۆ مەملەكەتتىك مەكتەپتەردىڭ بارلىعىندا 280 مىڭ مۇعالىم بارىن اتاپ وتكەن ەدى.

«قاجەتتىلىك - بەس مىڭ. پەداگوگ ماماندىعى بويىنشا دايىندالعان كادرلار جەتكىلىكتى. قالعان از ۋاقىتتىڭ ىشىندە مەكتەپتەر مەن ءبىلىم بولىمدەرى بوس ورىندارعا مۇعالىمدەردى قابىلداۋى كەرەك»، - دەيدى ەرلان ساعاديەۆ.