قازاقستانعا شەتەلدەن قانداي كولىكتەردى كىرگىزۋگە بولادى؟

استانا. قازاقپارات - باس كولىك پروكۋراتۋراسى ەلگە اكەلىنگەن اپاتتار كەزىندەگى شۇعىل شاقىرۋ جۇيەسى جوق كولىكتەرگە قاۋىپسىزدىك تۋرالى كۋالىكتەر بەرۋدەن باس تارتۋدىڭ زاڭدىلىعىنا تالداۋ جۇرگىزدى، دەپ حابارلايدى قازاقپارات.

«تالداۋ سىناق زەرتحانالارىنىڭ ناتيجەسى تەحنيكالىق رەتتەۋ جانە مەترولوگيا كوميتەتىنىڭ ۇلتتىق اككرەديتتەۋ ورتالىعى حاتىنا سىلتەمە جاساي وتىرىپ، مۇنداي كولىك قۇرالدارىنا قاۋىپسىزدىك تۋرالى كۋالىكتەر بەرۋدەن باس تارتقانىن كورسەتتى. بۇل ارەكەتتەر 244 جەكە جانە زاڭدى تۇلعانىڭ كولىك قۇرالدارىن كەدەندىك رەسىمدەۋىنە كەدەرگى كەلتىرگەن»، - دەلىنگەن باس كولىك پروكۋراتۋراسى باسپا ءسوز قىزمەتىنىڭ مالىمەتىندە.

سونىمەن قاتار، ورتالىقتىڭ نۇسقاۋى بويىنشا 2016-جىلعى 1- قاڭتاردان باستاپ بەرىلگەن كۋالىكتەردىڭ كۇشىن جويۋ جوسپارلانعان. بۇل تاعى 17209 اۆتوكولىك يەلەرىنىڭ قۇقىقتارىن جاپپاي شەكتەۋگە اكەپ سوعۋى مۇمكىن ەدى.

«ورتالىق قاۋىپسىزدىك تۋرالى كۋالىكتەر بەرۋدى توقتاتا تۇرۋ تۋرالى شەشىم قابىلداي وتىرىپ، ءوز وكىلەتتىكتەرى شەڭبەرىنەن شىققانى انىقتالدى. سەبەبى «سايكەستىكتى باعالاۋ سالاسىنداعى اككرەديتتەۋ تۋرالى» زاڭدا مۇنداي وكىلەتتىكتەر ايقىندالماعان، وسىلايشا ازاماتتاردىڭ ءوز مۇلكىن ەركىن پايدالانۋدا كونستيتۋتسيالىق قۇقىقتارىن شەكتەگەن»، - دەپ اتاپ وتىلگەن پروكۋراتۋرا حابارلاماسىندا.

راسىندا، «دوڭگەلەكتى كولىك قۇرالدارىنىڭ قاۋىپسىزدىگى تۋرالى» كەدەن وداعىنىڭ تەحنيكالىق رەگلامەنتى 2016-جىلعى 1- قاڭتاردان باستاپ، ە ا ە و- عا مۇشە مەملەكەتتەردىڭ اۋماعىنا اينالىمعا اپات كەزىندە شۇعىل جەدەل قىزمەتتەردى شاقىرۋ قۇرىلعىلارىمەن جابدىقتالعان كولىك قۇرالدارىن شىعارۋدى بۇيىرادى.

دەگەنمەن دە ەل اۋماعىنا مۇنداي قۇرىلعىسىز اۆتوموبيلدەردى اكەلۋگە تىيىم سالىنبايدى، سەبەبى ولار سەرتيفيكاتتالعان ديلەرلىك ورتالىقتاردا ورناتىلۋى مۇمكىن.

«باس كولىك پروكۋراتۋراسىنىڭ جازباشا نۇسقاۋى بويىنشا ۇلتتىق اككرەديتتەۋ ورتالىعى زاڭسىز حاتتى كەرى قايتارىپ الدى. سىناق زەرتحانالارى كۋالىكتەر بەرۋىن قايتا باستادى»، - دەپ ناقتىلادى باسپا ءسوز قىزمەتى.