جاقىپ اسانوۆ قازاقستاندا ەڭ ءبىرىنشى بولىپ ارىپتەسىنە حات جازۋ تاجىريبەسىن ەنگىزدى
بۇل جايىندا ق ر جوعارعى سوتىنىڭ سوتتاردىڭ قىزمەتىن قامتاماسىز ەتۋ دەپارتامەنتى اقپاراتتىق قامتاماسىز ەتۋ ءبولىمىنىڭ مەڭگەرۋشىسى بولات كاليانبەكوۆ فەيسبۋكتەگى پاراقشاسىندا جازدى، دەپ حابارلايدى قازاقپارات ءتىلشىسى.
«جاقىپ قاجىمان ۇلى جوعارعى سوتقا كەلگەن ساتىنەن باستاپ كوممۋنيكاتسيا ماسەلەسىنە باسىم نازار اۋداردى. بۇل رەتتە نەگىزگى قۇرالداردىڭ ءبىرى ونىڭ ارىپتەستەرىنە حات جازۋى بولدى. 8 ايلىق جۇمىسىنىڭ ىشىندە ول 5 حات جازدى. ولاردىڭ ءارقايسىسىنىڭ ناقتى تاقىرىبى مەن مىندەتى بار» ، - دەدى ب. كاليانبەكوۆ.
ونىڭ ايتۋىنشا، «از جاسالعان جوق، بىرگە جالعاستىرامىز!» دەپ اتالاتىن ءبىرىنشى حات 2017 -جىلدىڭ 20 - جەلتوقسانىندا جازىلعان. 2017 -جىلدىڭ 28 - جەلتوقسانىنداعى ەكىنشى حاتى «قازاقستاننىڭ ادۆوكاتتارى مەن پروكۋرورلارىنا» دەپ اتالعان. بۇل حاتتاردا ج. اسانوۆ سوتتاردىڭ جۇمىسىن جاقسارتۋ ءۇشىن اشىق سۇحبات باستاۋدى ۇسىنادى. جاۋاپ رەتىندە جوعارعى سوتقا مىڭعا جۋىق ۇسىنىس كەلىپ تۇسكەن.
«نە ىستەيمىز، نە ىستەيتىن بولامىز جانە نەلىكتەن؟ » دەپ اتالاتىن ءۇشىنشى حات 2018 -جىلدىڭ ناۋرىزىندا جازىلعان. وندا ج. اسانوۆ سوت جۇيەسىن جاڭعىرتۋ بويىنشا جۇرگىزىلىپ جاتقان جۇمىستار جايىندا باياندايدى. باس پروكۋرور 2018 -جىلدىڭ 26 - ساۋىرىندە جازعان بەسىنشى حاتىندا سوت جۇيەسىن جاڭعىرتۋ جايىنداعى اڭگىمەسىن ودان ارى جالعاستىرعان. سوت اكتىلەرىنىڭ ساپاسىنا ەرەكشە نازار اۋدارىپ، ۇزدىك سوت اكتىلەرى بايقاۋىنىڭ باستالعانىن جانە ونىڭ ماقساتىن جان- جاقتى اشىپ كورسەتكەن.
ال «سىزبەن ءبىزدىڭ جاۋاپكەرشىلىگىمىز جايىندا. كاسىبي ءارى جەكە» دەپ اتالاتىن بەسىنشى حات 2018 -جىلدىڭ 13 - تامىزىندا جازىلعان. وندا جوعارعى سوت ءتوراعاسى سۋديالاردى سوت ادىلدىگىن شىعارۋ بارىسىندا زاڭ مەن ار- وجداندى باسشىلىققا الۋعا شاقىرعان.
ب. كاليانبەكوۆتىڭ ايتۋىنا قاراعاندا، مەملەكەتتىك ورگانداردىڭ ءبىرىنشى باسشىلارىنا حات جازۋ تاجىريبەسى قازاقستاندا العاش رەت قولدانىلىپ وتىر. ج. اسانوۆتىڭ بارلىق حاتتارى بۇقارالىق اقپارات قۇرالدارىندا جاريالانعان.
