قازاقستان قىسقى وليمپيادانى وتكىزۋگە تاعى ءوتىنىش بەرە مە

استانا. قازاقپارات - ق ر مادەنيەت جانە سپورت ءمينيسترى ارىستانبەك مۇحامەدي ۇلى ءوز ەلىمىزدە قىسقى وليمپيادانى وتكىزۋگە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، بۇگىندە قىسقى سپورت تۇرلەرى بويىنشا كوپتەگەن نىساندار سالىنۋدا. وسى ورايدا ارىستانبەك مۇحامەدي ۇلى «بۋراباي» حالىقارالىق شاڭعى بازاسىنداعى ترامپلين قۇرىلىسىن ۇزارتۋدىڭ سەبەبىن دە ءتۇسىندىردى.

«ماسەلەن، جاقىندا عانا ەلباسىمىز شۋچينسكىگە بارىپ، حالىقارالىق سپورت ورتالىعىن اشتى. ول جەردە تاماشا ترامپلين دە بار. كوبىسى وسى نىساننىڭ قۇرىلىسى نەگە قاتتى ۇزارىپ كەتتى دەپ سۇرايدى. اشىعىن ايتۋ كەرەك، قۇرىلىس كومپانياسىنا قاتىستى ءبىرقاتار قيىندىقتار بولدى. سوسىن باس كەزىندە اتالعان نىسان سپورتشىلاردىڭ وقۋ- جاتتىعۋلارىن وتكىزەتىن ورىن بولادى دەپ جوسپارلانعان. ارتىنان حالىقارالىق جارىستارعا ارناپ سالۋعا بولادى دەگەن شەشىمگە كەلدىك. ءسويتىپ، ءتورت جىل بۇرىن تۇجىرىمداماسىن وزگەرتتىك. سەبەبى ءبىراز اقشا قۇيىلعاننان كەيىن ونى جان- جاقتى پايدالانۋ قاجەت»، - دەدى ا. مۇحامەدي ۇلى سپورت سالاسىنىڭ ۇزدىكتەرىن ماراپاتتاۋعا ارنالعان شارادا.

ونىڭ سوزىنە قاراعاندا، بۇگىندە استانا مەن الماتى قىسقى وليمپيادا ويىندارىن وتكىزۋگە دايىن. ماسەلەن، «الاۋ» سپورت كەشەنىندە كونكي جارىستارىن وتكىزۋگە بولادى. ال «بارىس- ارەنا» حوككەي ماتچتارىن ۇيىمداستىرا الادى. بۇدان بولەك، شاڭعى، بياتلون، مانەرلەپ سىرعاناۋ جانە تاعى باسقا سپورت تۇرلەرى بويىنشا ينفراقۇرىلىم بار.

«سوندىقتان ءبىز قىسقى وليمپيادا ويىندارى ەش قيىندىقسىز وتكىزە الامىز. قازاقستاندا حالىقارالىق جارىستاردى مىندەتتى تۇردە وتكىزۋ كەرەك. بۇگىندە دۇنيەءجۇزى وليمپيادا ويىندارى، ءيا بولماسا، فۋتبولدان الەم چەمپيوناتى ءۇشىن تالاسىپ جاتادى. سەبەبى ونداي شارالار كوپ نارسەنى وزگەرتەدى. ماسەلەن، رەسەيدە چەمپيونات وتكەننەن كەيىن حالىقتىڭ سپورتقا دەگەن قۇشتارلىعى ارتتى. ميلليونداعان جاستار فۋتبولعا قىزىعا باستادى. وتكەن جىلى ەلباسى ەكسپو اياسىندا يسپانيا كورولىمەن كەزدەستى. ول ايتادى، بارسەلونادا وتكەن وليمپيادادان كەيىن وسى ەلدىڭ ەكونوميكاسى، حالىقتىڭ ساناسى وزگەردى. سوندىقتان الداعى ۋاقىتتا مۇمكىندىك بولسا، قىسقى وليمپيادانى وتكىزۋگە ءوتىنىش بەرەمىز. ارينە، الدىمەن ساياسي شەشىم بولۋى كەرەك. ەندى، 2022 -جىلعى قىسقى وليمپيادانى وتكىزۋ ءۇشىن بەيجىڭمەن تالاستىق. سول كەزدە ءۇش- اق ۇپايمەن قالىپ قويدىق. دەگەنمەن، كەلەشەكتە ۇسىنىس قالاي تۇسەدى، سولاي بىردەن ءوتىنىشىمىزدى بەرەمىز»، - دەدى ا. مۇحامەدي ۇلى قازاقپارات تىلشىسىنە بەرگەن سۇحباتىندا.

ايتا كەتەيىك، 2015 -جىلى قازاقستان قىسقى وليمپيادا ويىندارىن وتكىزۋگە ءوتىنىش بەرگەن بولاتىن. سول كەزدە داۋىس بەرۋ ناتيجەسى بويىنشا قىتايدىڭ بەيجىڭ قالاسى جەڭىسكە جەتتى. بيىلعى اق وليمپيادا وڭتۇستىك كورەيانىڭ پحەنچحان قالاسىندا ءوتتى. ءتورت جىلدان كەيىن بەيجىڭدە وتەدى. 2026 -جىلعى ۇمىتكەرلەر ءالى انىقتالعان جوق.

اۆتور: ارمان اسقاروۆ