ولگا رىپاكوۆا ازيادا ويىندارىندا ءۇش قارعىپ سەكىرۋدەن عانا سىنعا تۇسەدى
قازىرگى تاڭدا تانىمال سپورتشى مالايزيا استاناسىندا سوڭعى وقۋ- جاتتىعۋ جيىندارىن وتكىزىپ جاتىر. رىپاكوۆا باستاعان جەڭىل اتلەتتەر دجاكارتاعا كۋالا-لۋمپۋردەن ۇشىپ كەتەدى.
«بۇگىندە مالايزيا استاناسى كۋالا-لۋمپۋردەگى سوڭعى جيىنىمىز وتۋدە. بارلىعى جوعارى دەڭگەيدە. قاتەلەسپەسەم، 22- تامىز كۇنى ۇشامىز. مەن تەك قانا ءۇش قارعىپ سەكىرۋدەن باق سىنايمىن. الدا مەنى كوپتەگەن جارىستار كۇتىپ تۇر. الەم كۋبوگى بار... سوندىقتان، ءبىر جارىس باعدارلاماسى بويىنشا مەدالعا ۇمىتكەر بولعان دۇرىس. ونىڭ ۇستىنە، ازيا ويىندارىندا الدىن الا سەكىرۋلەر بولادى. ەڭ باستىسى - دايىندىق وتە جاقسى وتۋدە»، - دەيدى رىپاكوۆا.
ەسكە سالا كەتەيىك، ولگا رىپاكوۆا 2006-جىلدان بەرگى سوڭعى ءۇش ازيا ويىندارىندا چەمپيون اتانعان بولاتىن. سونداي-اق، ونىڭ ەنشىسىندە كۇمىس جانە قولا مەدال دا بار.
2018-جىلعى ازيا ويىندارىنداعى جەڭىل اتلەتتەر جارىسى 25- تامىزدا باستالادى.
