ا ق ش- تا رەسەيگە قارسى جاڭا سانكسيا تۋرالى زاڭ جوباسى جاريالاندى
«ا ق ش قاۋىپسىزدىگىن كرەمل باسقىنشىلىعىنان قورعاۋ تۋرالى زاڭ» دەپ اتالاتىن قۇجات ا ق ش پرەزيدەنتى دونالد ترامپتىڭ رەسەي پرەزيدەنتى ۆلاديمير پۋتينمەن 16 - شىلدەدە حەلسينكيدە كەزدەسۋىنەن كەيىن ازىرلەندى. قۇجات ساياسي مالىمدەمەلەر مەن رەسەي ارەكەتىنە جاۋاپ رەتىندە ءبىرقاتار ناقتى قادامداردان تۇرادى.
زاڭ جوباسىندا ا ق ش 1940 - جىلى قابىلدانعان سوۆەت وداعىنىڭ بالتىق ەلدەرىن اننەكسيالاۋىن مويىنداماۋ جونىندەگى دەكلاراتسيا ۇلگىسىمەن رەسەيدىڭ قىرىم اننەكسياسىن مويىندامايتىنى ايتىلعان. سونىمەن بىرگە قۇجات ا ق ش پرەزيدەنتى اكىمشىلىگىنە ەلدىڭ ناتو قۇرامىنان شىعۋ قادامدارىنا تىيىم سالادى.
زاڭ جوباسىنىڭ بولەك تاراۋلارىندا رەسەي ۇلى بريتانيانىڭ سولسبەري قالاسىندا ەكس- اگەنت سەرگەي سكريپال مەن قىزى يۋليا سكريپالدى ۋلاۋ، كيبەرشابۋىل جاساۋ جانە 2016 -جىلى ا ق ش پرەزيدەنتى سايلاۋىنا كيلىگۋگە كىنالى دەپ تانىلعان. مۇندا سونىمەن بىرگە رەسەيدىڭ سيريادا اسكەري قىلمىس جاساۋى ىقتيمالدىعى دا ايتىلعان.
قۇجات قابىلدانعاننان كەيىن، 180 كۇن ىشىندە ا ق ش پرەزيدەنتى «رەسەي پرەزيدەنتى ۆلاديمير پۋتيننىڭ مۇددەسى ءۇشىن زاڭسىز جانە سىبايلاس جەمقورلىق ارەكەتىنە بارىپ جاتقان ساياساتكەرلەر مەن وليگارحتارعا جانە پۋتينمەن بايلانىسى بار ادامدار مەن ۇيىمدارعا قارسى سانكسيالار ەنگىزۋى ءتيىس».
قۇجات رەسەيدىڭ دەربەس قارىزىنا بايلانىستى ترانزاكسياعا شەكتەۋ قويۋدى كوزدەيدى. ا ق ش- تا رەسەيدىڭ «سبەربانك»، ۆ ت ب، «ۆنەشەكونوم بانك» جانە «گازپروم بانك» سەكىلدى ءىرى بانكتەرىنىڭ جۇمىس ىستەۋىنە تىيىم سالۋ دا قاراستىرىلعان.
زاڭ جوباسىندا ا ق ش- تىڭ ۇلتتىق بارلاۋ قىزمەتى 180 كۇن ىشىندە كونگرەسسكە ۆلاديمير پۋتين مەن ونىڭ وتباسى مۇشەلەرىنىڭ جەكە اكتيۆتەرى جونىندە مالىمەت بەرۋ كەرەكتىگى ايتىلعان.
زاڭ جوباسى قابىلدانعاننان كەيىن 90 كۇن ىشىندە مەملەكەتتىك حاتشى كونگرەسسكە رەسەي «تەرروريزمدى قارجىلاندىراتىن مەملەكەت» ولشەمدەرىنە سايكەس كەلەتىن- كەلمەيتىنى جونىندە پىكىر ءبىلدىرۋ ءتيىس.
بۇل زاڭ جوباسىنىڭ قاشان قارالاتىنى ازىرگە بەلگىسىز. رەسەيگە قارسى سانكسيالار ەنگىزۋ تۋرالى زاڭ جوباسىن بىلتىر كونرگەسستىڭ قوس پالاتاسى كوپشىلىك داۋىسپەن قابىلداعان.
www.azattyq.org
