بەس جۇزگە جۋىق ادام ءبىر ۋاقىتتا گيتارادا وينادى
457 گيتاراشىدان قۇرالعان توپ AC/DC ۇجىمىنىڭ «Highway to Hell» ءانىن ءبىر ۋاقىتتا گيتارامەن سۇيەمەلدەپ ورىندادى. بۇل جيىن رەكورد ورناتۋ ماقساتىندا ارنايى ۇيىمداستىرىلعان. جاڭالىقتى العاش بولىپ جەرگىلىكتى The Newcastle Herald باسىلىمى حابارلادى. «بىرنەشە گيتارانىڭ ءۇنى جاندى تەبىرەنتىپ جىبەرەدى ەكەن. جيىن وتكەن اۋماقتا كەرەمەت اتموسفەرا ورنادى. مەن ومىرىمدە وسىنشا كوپ گيتارانى جانە ونى ناقىشىنا كەلتىرە تارتىپ تۇرعان وسىنشاما ەر ازاماتتاردى كورمەپپىن» ، - دەدى فەستيۆال ۇيىمداستىرۋ توبىنىڭ مۇشەسى تاتيانا مارچان. رەكوردتىق كورسەتكىشكە جەتۋگە ۇيىمداستىرىلعان شاراعا قاتىسۋ اقىلى بولدى.
تاريحتا قالاتىن بۇل كەشتە اسپاپتا ويناۋ ءۇشىن گيتاراشىلار 45 دوللار تولەپ قاتىستى. جينالعان قارجى اۆستراليالىڭ بالالار مۋزىكا مەكتەبىنىڭ قورىنا اۋدارىلدى. بارلىق گيتاراعا داۋىس كۇشەيتكىش قۇرالدار ورناتىلدى. جەرگىلىكتى The Choirboys توبى كەلگەن قاتسۋشىلارعا سۇيەمەلدەۋدى باستاپ بەرىپ، وزدەرى ءان شىرقاپ تۇردى. مۋزىكا فەستيۆالى اۆستراليا استاناسى سيدنەي قالاسىندا 19 - تامىزعا دەيىن سوزىلماق. الەمدىك رەكورد رەتىندە تىركەلگەن ورىنداۋشىلاردىڭ ۆيدەوسى Youtube جەلىسىندە دە جاريالاندى. بيبليالىق ەرتەگىلەردە كەزدەسەتىن شۋمەر- ۆاۆيلوندىقتاردىڭ ىشەكتى اسپابىنىڭ تاريحى تىم تەرەڭدە جاتىر. الايدا، بۇل - جەكە تاقىرىپ.
ەسكە سالا كەتەيىك، گيننەس رەكوردتار كىتابىندا «توپپەن گيتارا تارتۋ» بويىنشا وسىعان دەيىنگى رەكورد ءۇندىستاندا تىركەلگەن ەدى. 2013 -جىلى 368 ادامنان قۇرالعان توپ گيتارامەن «Knocking On Heavenʼs Door» ءانىن بىردەي ورىنداعان ەكەن.
Massaget.kz
