تۇركيا ا ق ش- تىڭ قىسىمىنا تىزەسىن بۇگىپ، باس يمەيدى
ونىڭ ايتۋىنشا، تۇركيا قۇراما شتاتتاردىڭ قۇيتىرقى ساياساتىنا قارسى تۇرۋ ءۇشىن وزگە وداقتارمەن ەكونوميكالىق ارىپتەستىكتى كۇشەيتە تۇسەدى. ال ۇلتتىق ۆاليۋتانىڭ قۇنسىزدانۋى ەلدىڭ شىنايى ەكونوميكاسىنىڭ كورسەتكىشى بولىپ وتىرعان جوق. سوندىقتان حالىقتى ۇرەيگە بەرىلىپ، دۇربەلەڭگە جول بەرمەۋگە شاقىردى.
رەجەپ تايىپ ەردوعان، تۇركيا پرەزيدەنتى:
- بۇكىل الەمگە، ونىڭ ىشىندە، ءبىزدىڭ ەلگە دە قىسىم كورسەتىپ جاتقان ا ق ش- قا ءبىز جاڭا نارىقتارمەن بايلانىستى كۇشەيتۋ ارقىلى جاۋاپ بەرەتىن بولامىز. ولاردىڭ ءىسى دۇنيەجۇزىلىك ساۋدا ۇيىمىنىڭ تارتىبىنە قايشى. ءبىراق ءبىز ءوندىرىسىمىزدى دامىتىپ، ەكسپورتىمىزدى ارتتىرامىز.
ەسكە سالا كەتەيىك، ەكى ەل اراسىنداعى قارىم- قاتىناس بىرەر اپتا بۇرىن ا ق ش قارجى مينيسترلىگىنىڭ انكارانىڭ امەريكالىق شىركەۋ قىزمەتكەرى ەندريۋ برانسوندى قاماۋدان بوساتپاۋىنا بايلانىستى سانكسيا سالعان سوڭ شيەلەنىسكەن. ءبىراق ەردوعان ا ق ش- تىڭ ادىلەت جانە ىشكى ىستەر مينيسترلىگىنىڭ ەسەپ- شوتتارىن بۇعاتتاۋمەن جاۋاپ قايتاردى. وسىدان كەيىن پرەزيدەنت دونالد ترامپ تۇركيادان اكەلىنەتىن بولات پەن اليۋمينيگە سالىقتى ەكى ەسەگە كوتەرىپ، تۇرىك ليراسى %20- عا قۇنسىزداندى. پرەزيدەنت ەردوعاننىڭ ايتۋىنشا، ۆاشينگتون وسىنداي ارەكەتتەر ارقىلى تۇركياعا ءوز ءامىرىن جۇرگىزگىسى كەلەدى.
ال تۇركيانىڭ باس بانكى كۇندىزگى جانە تۇنگى مولشەرلەمە بويىنشا قاجەتتى تەڭگەرىم وتىمدىلىگىن قامتاماسىز ەتەتىندىگىن جەتكىزدى. سونىمەن قاتار جەكە بانكتەر ءبىر ايعا ۆاليۋتالىق كرەديت الا الادى. قارجىلىق قۇرىلىمدارعا 10 ميلليارد تۇرىك ليراسى، 6 ميلليارد دوللار جانە قۇنى 3 ميلليارد دوللار تۇراتىن التىن بولىنەتىن بولدى. 10 تامىزدا ا ق ش تاراپى تۇركياعا اليۋمينيي مەن بولاتقا باج سالىعىن 20 پايىزدان 50 پايىزعا كوتەرگەن ەدى. ءدال سول كۇنى رەجەپ تاييپ ەردوعان سەرىكتەستەرمەن ەسەپتى ۇلتتىق ۆاليۋتادا جۇرگىزەتىنى تۋرالى حابارلادى. ايتا كەتۋ كەرەك، جىل باسىنان بەرى ۇلتتىق ۆاليۋتانىڭ قۇنى 38 پايىزعا تومەندەگەن.
www.24.kz
