شاكارىمنىڭ «سايات-قورا» ەكسپوزيتسياسى جوندەلدى
مۇراجاي شاكارىمنىڭ «سايات-قورا» ەكسپوزيتسياسى دەپ اتالادى. بيىل مادەني نىسانعا 12 جىلدان كەيىن جوندەۋ جۇمىستارى جۇرگىزىلىپ، جاڭا جادىگەرلەر اكەلىندى، دەپ حابارلايدى قازاقپارات.
بيىل شاكارىم قاجىنىڭ 160 جىلدىق مەرەيتويىنا وراي توزىعى جەتكەن مادەني نىسانعا اعىمداعى جوندەۋ جۇمىستارى جۇرگىزىلدى. مۋزەي كىرەبەرىسى قايتا قالانىپ، جاڭاشا بوي كوتەردى. بارلىق جۇمىستاردى مۋزەي قىزمەتكەرلەرى «اقشىڭ» كورپوراتسياسىنىڭ باسشىسى مارات قۇرمانبايەۆتىڭ اقشالاي كومەگىنىڭ ارقاسىندا وزدەرى جاساپ شىققان.
«سايات-قورا» ەكسپوزيتسياسى اقىننىڭ ءومىرى مەن سوڭىندا قالدىرعان مۇراسىن ناسيحاتتاۋعا ارنالعان. اباي قورىق-مۋزەيىنىڭ قورىندا جيناقتالعان اقىننىڭ وسكەن ورتاسى، العان ءبىلىمى تۋرالى ەستەلىكتەر، وي-تانىمىن كورسەتەتىن ادەبيەتتەر، ابايمەن قارىم-قاتىناسىنا بايلانىستى ماتەريالدار، قاجىلىق ساپارى، قوعامدىق قىزمەتى مەن الاشوردا ۇكىمەتىنە قاتىسى تۋرالى مۇراعاتتاردان تابىلعان دەرەكتەر، قولجازبالار مەن اقىن شىعارمالارىنىڭ باسىلىمدارى، مۇراگەرى احات شاكارىم ۇلىنىڭ جەكە زاتتارى مەن سول زاماننان حابار بەرەتىن ەتنوگرافيالىق زاتتار ورىن العان. جوندەۋ جۇمىستارىنان كەيىن تاعى دا تولىقتىرۋ جۇمىستارى جۇرگىزىلگەن.
«بيىل شاكارىم قاجى قۇدايبەردى ۇلىنىڭ 160 جىلدىق مەرەيتويىنا وراي «سايات-قورا» كۇردەلى جوندەۋدەن ءوتىپ، رەەكسپوزيتسيا جاسالدى. بۇل جۇمىستار «سايات-قورانىڭ» تاقىرىپتىق مازمۇنىن بايىتىپ، ەكسپوناتتار قاتارىن مولايتۋعا مۇمكىندىك بەرەدى. جالپى قۇرىلىس مامىر ايىندا باستالىپ، شىلدە ايىنىڭ سوڭىندا اياقتالدى. اباتتاندىرۋ جۇمىستارى جۇرگىزىلدى. ەكسپوناتتار اكەلىندى. ولاردىڭ ىشىندە ات ابزەلدەرى، جابايى اڭ تەرىلەرى، شەجىرە مەن تانىمدىق ماتەريالدار، سول زاماننىڭ تۇرمىستىق زاتتارى بار. اسىرەسە، شاكارىم بابامىزدىڭ زامانۋي ماتەريالدان سومدالعان كەلبەتى جۇرتشىلىق كوڭىلىنەن شىقسا كەرەك»، - دەدى مۋزەي ديرەكتورى بولات جۇنىسبەكوۆ.
