ماجارستاندا «تۇران» حالىقتارىنىڭ قۇرىلتايى وتۋدە
شاراعا 30 دان استام ەل مەن حالىقتىڭ دەلەگاتسيالارى قاتىستى. قۇرىلتاي «تۇران» ەجەلگى جاۋىنگەرلەرى شەرۋىنىڭ جاڭارتىلعان سالتاناتىمەن اشىلدى. حالىقارالىق شاراعا قاتىسۋشىلار الدىندا ۆەنگريا پارلامەنتىنىڭ سيپكەرى لاسلو كيەۆەر ءسوز سويلەدى. ال اقتوبە وبلىسىنىڭ اكىمى بەردىبەك ساپاربايەۆ ءوز قۇتتىقتاۋىندا وسىناۋ قىزىقتى ءارى جوعارى دەڭگەيدە ۇيىمداستىرىلعان شاراعا ۇيىتقى بولعاندارعا ريزاشىلىعىن ءبىلدىردى.
سونىمەن قاتار بەردىبەك ساپاربايەۆ قۇرىلتايعا قازاقستان پرەزيدەنتىنىڭ تاپسىرماسىمەن كەلگەنىن ايتتى. قازاقستان مەن ماجارستان اراسىنداعى تاريحي، مادەني جانە ەكونوميكالىق بايلانىستاردىڭ جىلدان جىلعا تەرەڭدەپ، نىعايا ءتۇسىپ كەلە جاتقاندىعىن اتاپ ءوتتى. وعان قازاقستان پرەزيدەنتى نۇرسۇلتان نازاربايەۆتىڭ ماجارستانعا جانە ەلدىڭ پرەمەر- ءمينيسترى ۆيكتور ورباننىڭ استاناعا ساپارى جارقىن دالەل بولا الادى.
مۇنان بولەك، اقتوبە وبلىسىنىڭ اكىمى قازاقستاندا تۇركىستان وبلىسىنىڭ قۇرىلعانىن، ول تاريحي تۋريزم بازاسىن قۇرۋ ءۇشىن ۇلكەن مۇمكىنشىلىكتەر اشاتىندىعىن جانە «تۇران» حالىقتارى قۇرىلتايىنا قاتىسۋشىلاردىڭ دا قىزىعۋشىلىعىن تۋدىراتىندىعىن ايتتى.
ب. ساپاربايەۆ قازاقستاندا عۇنداردىڭ تاريحىن، ونەرى مەن مادەنيەتىن زەرتتەۋ ورتالىعىنىڭ قۇرىلعاندىعىن اتاپ ءوتتى. سونىمەن قاتار قاتىسۋشىلاردى كەلەسى جىلى قازاقستاندا قۇرىلتاي وتكىزۋگە شاقىردى. ءسوز سوڭىندا «ماديار تۇران» قورىنا اقتوبە وبلىسىنىڭ اتىنان قازاقتىڭ كيىز ءۇيىن تارتۋ ەتتى.
قۇرىلتاي اياسىندا دوڭگەلەك ۇستەل ءوتىپ، وعان حالىقارالىق تۇركى اكادەمياسىنىڭ پرەزيدەنتى دارحان ءقىدىرالى، «ساكرالدى قازاقستان» عىلىمي- زەرتتەۋ ورتالىعىنىڭ جەتەكشىسى بەرىك ءابدىعالي ۇلى، ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى ايبولات كوشكىنبايەۆ قاتىستى. وندا تۇركى اكادەمياسىنىڭ، سونداي- اق «ساكرالدى قازاقستان» ورتالىعىنىڭ تانىستىرىلىمى بولدى. «ساكرالدى قازاقستان» «رۋحاني جاڭعىرۋ» باعدارلاماسى اياسىندا جۇزەگە اسىرىلۋدا.
دارحان قىدىرالى ماجارلىق ساراپشىلار مەن عالىمداردى «شيۆەەت ۋلاان» (موڭعوليا - اۆت. ) جەرىندەگى ءبىرىنشى تۇركى عيباداتحاناسىنىڭ ورنىندا جۇرگىزىلگەن سوڭعى قازبا جۇمىستارىنىڭ ناتيجەلەرىمەن تانىستىردى. ال بەرىك ءابدىعالي ۇلى «ساكرالدى قازاقستان» كىتابىن تانىستىرىپ، بوزاق قالاشىعى جانە ونىڭ عۇندارمەن بايلانىس جايىندا كەڭىنەن ءسوز قوزعادى.
«تۇران» حالىقتارى قۇرىلتايشىسىنىڭ نەگىزىن قالاۋشى جانە يدەيالىق شابىتتاندىرۋشى اندراش بيرو حالىقارالىق تۇركى اكادەمياسىنىڭ التىن مەدالىمەن ماراپاتتالدى.
دوڭگەلەك ۇستەل اياسىندا حالىقارالىق تۇركى اكادەمياسى مەن «ماديار تۇران» قورى ىنتىماقتاستىق تۋرالى مەموراندۋمعا قول قويدى.
قۇرىلتاي جۇمىسى ەكى كۇنگە جالعادى. وندا «تۇران» تاريحي اۋماعىن قامتيتىن حالىقتاردىڭ باي تاريحي- مادەني مۇراسى ۇسىنىلادى.
