ۆەنگريا پارلامەنتىنىڭ سپيكەرى قازاق كيىز ۇيىنەن ءدام تاتتى

استانا. قازاقپارات - وسى كۇندەرى ۆەنگريانىڭ بۋگاتس قالاسىندا ءوتىپ جاتقان «تۇران» حالىقتارىنىڭ قۇرىلتايىندا تۇركى تىلدەس ەلدەر وزدەرىنىڭ ۇلتتىق كيىز ۇيلەرىن تىكتى، دەپ حابارلايدى قازاقپارات ءتىلشىسى.

قازاقستان تىككەن 12 قاناتتى كيىز ءۇيدىڭ سىرتقى جانە ىشكى سالتاناتى دا كەلىستى. سوندىقتان دا قۇرىلتاي قوناقتارىنىڭ نازارىن بىردەن وزىنە اۋداردى. قازاقتاردىڭ ۇلتتىق باسپاناسىنا باس سۇققان ءاربىر كەلۋشىگە شاعىن سىيلىق، كيىز ءۇي تۇرىندەگى قوراپقا سالىنعان تاتتىلەر بەرىلدى. قوناقتارعا ارنالعان ءدامدى قۇرامىندا 60 قا جۋىق ادام بار قازاقستاندىق دەلەگاتسيا ارنايى دايىنداعان. قۇرىلتايدىڭ ەكى كۇنىنىڭ ىشىندە مىڭنان استام سارقىت تاراتىلدى.

اقتوبە وبلىسىنىڭ اكىمى بەردىبەك ساپاربايەۆتىڭ ارنايى شاقىرۋىمەن ۆەنگريا ۇلتتىق جينالىسىنىڭ سپيكەرى لاسلو كيەۆەر قازاق ۇيگە قوناققا كەلدى. قازاقتىڭ قوناقجايلىق داستۇرىنە سايكەس مارتەبەلى مەيمانعا قىمىز بەن باۋىرساق ۇسىنىلدى. مۇنان بولەك، قازاق كيىز ۇيىندە قۇرىلتايعا كەلگەن وزگە دە رەسمي تۇلعالار بولدى.

 ۆەنگريا پارلامەنتىنىڭ سپيكەرى قازاق كيىز ۇيىنەن ءدام تاتتى ايتا كەتەيىك، 11 - تامىز كۇنى ۆەنگريانىڭ بۋگاتس قالاسىندا «تۇران» حالىقتارىنىڭ 10- حالىقارالىق قۇرىلتايى باستالدى. شاراعا 30 دان استام ەل مەن حالىقتىڭ دەلەگاتسيالارى قاتىسۋدا. قۇرىلتاي «تۇران» ەجەلگى جاۋىنگەرلەرى شەرۋىنىڭ جاڭارتىلعان سالتاناتىمەن اشىلدى. حالىقارالىق شاراعا قاتىسۋشىلار الدىندا ۆەنگريا پارلامەنتىنىڭ سيپكەرى لاسلو كيەۆەر ءسوز سويلەدى. ال اقتوبە وبلىسىنىڭ اكىمى بەردىبەك ساپاربايەۆ ءوز قۇتتىقتاۋىندا وسىناۋ قىزىقتى ءارى جوعارى دەڭگەيدە ۇيىمداستىرىلعان شاراعا ۇيىتقى بولعاندارعا ريزاشىلىعىن ءبىلدىردى.

سونىمەن قاتار بەردىبەك ساپاربايەۆ قۇرىلتايعا قازاقستان پرەزيدەنتىنىڭ تاپسىرماسىمەن كەلگەنىن ايتتى. قازاقستان مەن ۆەنگريا اراسىنداعى تاريحي، مادەني جانە ەكونوميكالىق بايلانىستاردىڭ جىلدان جىلعا تەرەڭدەپ، نىعايا ءتۇسىپ كەلە جاتقاندىعىن اتاپ ءوتتى. مۇنان بولەك، قاتىسۋشىلاردى كەلەسى جىلى قازاقستاندا قۇرىلتاي وتكىزۋگە شاقىردى. ءسوز سوڭىندا «ماديار تۇران» قورىنا اقتوبە وبلىسىنىڭ اتىنان قازاقتىڭ كيىز ءۇيىن تارتۋ ەتتى.