قازاقستاندىق بوكسشى گولوۆكيننىڭ سالماعىندا العاشقى جەكپە-جەگىن وتكىزبەك

استانا. قازاقپارات - قازاقستاندىق كاسىپقوي بوكسشى سادريددين احمەدوۆ (3-0، 3 ك و) 7- قىركۇيەك كۇنى كانادانىڭ ەدمونتون قالاسىندا جەكپە-جەك وتكىزەدى، دەپ حابارلايدى Sports.kz.

وندا جەرلەسىمىز ارگەنتينالىق برۋنو لەوناردو رومايمەن (21-5، 18 ك و) بوكستاسپاق. BoxRec.com تاراتقان اقپاراتقا سەنسەك، بۇل جولى احمەدوۆ العاش رەت ورتا سالماق ساناتىندا ءوزىن بايقايدى. بۇرىنعى جەكپە-جەكتەرىن سادريددين ءبىرىنشى ورتا سالماقتا وتكىزگەن بولاتىن.

بۇرىن احمەدوۆ تاعى ءبىر قازاقستاندىق بوكسشى نۇرزات سابىروۆپەن (7-0، 6 ك و) بىرگە 13- قازاندا مونرەالدا جەكپە-جەك وتكىزەتىنى حابارلانعان بولاتىن. ءبىراق مونرەالدا ولارعا كىمدەر قارسىلاس بولاتىنى ازىرگە بەلگىسىز.

ايتا كەتەيىك، رومايعا قازاقستاندىق بوكسشىلاردىڭ پارمەنى بەلگىلى. 2017-جىلدىڭ قىركۇيەگىندە ول جانقوش تۇراروۆپەن كەزدەسكەن ەدى. تورەشىلەر ءبىراۋىزدان جەڭىستى جانقوشقا بەرگەن سوڭ، روماي رينگتەن كەتىپ قالعان ەدى.