گرەكيادا توتەنشە جاعداي جاريالاندى

افينى. قازاقپارات - قۇرلىقتىق گرەكيا وبلىسىنىڭ گۋبەرناتورى كوستاس باكوياننيس جەكسەنبىدە ەۆبەيا ارالىنداعى ديرفيون- مەسساپيون مۋنيتسيپاليتەتىندە الاپات ورمان ورتىنە بايلانىستى توتەنشە جاعداي جاريالادى، دەپ حابارلايدى ت ا س س.

«جەرگىلىكتى ءوزىن-ءوزى باسقارۋ ورگاندارى ءورتتى سوندىرۋگە كومەكتەسىپ جاتىر. قازىر عانا توتەنشە جاعداي جاريالادىق. بارشانى پوليتسيا مەن ءورت سوندىرۋشىلەردىڭ نۇسقاۋلارىن ورىنداۋعا شاقىرامىز»، - دەپ جازدى باكوياننيس فەيسبۋكتەگى پاراقشاسىندا.

ءورت سوندىرۋشىلەردىڭ سوزىنە قاراعاندا، داعدارىستاردى باسقارۋ جونىندەگى كەڭەس قۇرىلىپ، ىشكى ىستەر ءمينيسترى پانوس سكۋرلەتيستىڭ قاتىسۋىمەن جيىن وتكىزگەن.

ازىرگە ءورتتىڭ نەگىزگى وشاعىن اۋىزدىقتاۋدىڭ ءساتى تۇسپەي وتىر. ءورت وشاعىندا ورنالاسقان كوندودەسپوتي كەنتى، وعان كورشىلەس وتىرعان ستاۆروس ەلدى مەكەنى ەۆاكۋاتسيالانعان. ەۆبەياداعى ءورتتى سوندىرۋگە 186 ادام، 62 تەحنيكا جۇمىلدىرىلعان.

بيلىك وكىلدەرىنىڭ ايتۋىنشا، ەۆبەياداعى ءورت سالدارىنان زارداپ شەككەندەر جوق، وڭىردە تەك ەكى ءۇي جانىپ كەتكەن. ەلدى مەكەندى اينالا ءوسىپ تۇرعان ورماندار جالىن قۇشاعىندا قالعان. ونىڭ ۇستىنە جەلدىڭ كۇشەيۋى ءورت ءسوندىرۋ جۇمىستارىن قيىنداتا تۇسۋدە.

ەسكە سالا كەتەيىك، گرەكيادا بيىلعى جازدا الاپات ورتتەر تولاستاماي تۇر. وتكەن ايدىڭ اياعىندا اتتيكادا ءورت سالدارىنان قازا تاپقانداردىڭ سانى 70 تەن اسقان بولاتىن.