اققۋلى اۋدانىندا اباي قۇنانباي ۇلىنىڭ تۋعان كۇنىنە وراي الامان ايتىس ءوتتى
الامانعا وبلىستىڭ ءار وڭىرىنەن 8 جاس اقىن قاتىستى. ولار 4 جۇپ بولىپ ءوزارا ولەڭنەن ورنەك سالىپ، باق سىناستى. جىر توكپەلەپ، ايتىستاعى ءداستۇر بويىنشا بارلىعى دا قارسىلاسىن قاپى قالدىرىپ، وزا شابۋعا تىرىستى. جىر سايىسىنا «الاش» سىيلىعىنىڭ يەگەرى، اقىن ارمان قاني باستاعان وبلىستىق، رەسپۋبليكالىق اقىندار ايتىسىنىڭ جۇلدەگەرلەرى قازىلىق ەتتى.
«بۇگىن وزگەشە ايتىس بولدى. اقىندار ابايدى، ونىڭ اكەسى قۇنانبايدى، سونىمەن قاتار، جاقىندا عانا تاريحي اتاۋىن قايتارعان اققۋلى مەكەنىن تاقىرىپقا ارقاۋ ەتتى. بۇگىنگى ايتىسقا جالپى 8 اقىن قاتىسىپ وتىر. بۇل ايتىس جاس اقىندارىمزدىڭ تالانتىن، دارىنىن كورسەتۋدە. جاس اقىندارىمىز شىڭدالىپ كەلەدى. ولار وبلىسىمىزدىڭ نامىسىن قورعاپ، ايتىس ونەرىنىڭ جالاۋىن جەلبىرەتىپ، تۋىن جىقپاي كەلە جاتىر. اللا قالاسا، بۇل ايتىس رەسپۋبليكالىق دەڭگەيگە كوتەرىلىپ، اسقاقتايدى دەگەن ۇمىتتەمىز»، - دەدى ارمان قاني.
اقىندارىن الاقاندا ايالاپ، ۇكىلەپ ءجۇرىپ بايگەگە قوساتىن قايمانا ەلدىڭ قاشاندا اسىعا كۇتەتىنى - وتتى جىر. وسى ورايدا جينالعاندار جاس اقىنداردىڭ شەبەرلىگى مەن شەشەندىگىنە ەرەكشە ىقىلاس تانىتىپ، شابىت بەرىپ وتىرسا، اقىندار جىرعا شولدەگەن ەلدى ءسوز قۇدىرەتىمەن سۋسىنداتا الدى.
قازىلار القاسىنىڭ شەشىمىمەن باس جۇلدەنى باياناۋىلدىق التاي قادىربەك يەلەنىپ، جۇلدەلى 1- ورىن نۇربەك باكىرگە بۇيىردى. ال، 2- ورىنعا پاۆلودارلىق ايبەك ورالحان لايىق دەپ تانىلسا، 3- ورىندى اققۋلىق اقىن مارعۇلان جانباۋ جەڭىپ الدى. سونىمەن قاتار، الاماندا ءسوز شەبەرلىگىن تانىتا بىلگەن جاس اقىندارعا ارنايى نوميناتسيالار بەرىلدى. اققۋلى اۋدانى اكىمىنىڭ ارنايى جۇلدەسىمەن ميزان ءجۇمالى ماراپاتتالسا، «جاۋھار اقىن» نوميناتسياسى ازامات بازاربايعا، «ولەڭ ءسوزىڭ پاتشاسى» - مارەس بايرونعا، «ارقالى اقىن» - قۋاندىق باشويعا تابىستالدى.
