ۇلى بريتانيا پاتشايىمى اقتوبەلىك قىزدىڭ حاتىنا جاۋاپ جازدى
استانا. قازاقپارات - اقتوبە تۇرعىنى زارينا احمەتجان ەليزاۆەتا II پاتشايىمعا حات جازىپ، ودان جاۋاپ الدى.
پاتشايىمنىڭ قازاقستاندىق قىزبەن كەزدەسە المايتىنى ايتىلسا دا، ول وقۋىن انگليادا جالعاستىرماق، دەپ حابارلايدى ەۆرازيا ارناسى.
زارينا بالا كۇنىنەن اعىلشىن مادەنيەتىمەن سۋسىنداپ وسكەن. ول ۇلى بريتانيا ەلىنە بارۋدى ارمانداعان. اعىلشىن ءتىلىن مەڭگەرىپ، ەلدىڭ تاريحى مەن داستۇرىمەن تانىسادى.
بويجەتكەن كوپ ويلانا كەلە پاتشايىمنىڭ وزىنە حات جازادى. الايدا ول جاقتان جاۋاپ كەلەدى دەپ كۇتپەگەن.
كەيىن پاتشالىقتان حات العاندا، تاڭدانىسىن جاسىرا المادى.
«حاتتا ەليزاۆەتا II پاتشايىمنىڭ مەنىڭ حاتىمدى جوعارى باعالايتىنى، ءبىراق قالاعان ادامنىڭ بارىمەن كەزدەسە المايتىنى جازىلعان»، - دەيدى زارينا.
پاتشايىم كەزدەسە الماعانىمەن، زاريناعا ءوز سۋرەتىن ەستەلىككە جىبەرگەن. وسىدان سوڭ زارينانىڭ انگليادا وقۋ نيەتى ۇدەي تۇسەدى.
قازىر سىناققا قىزۋ دايىندالىپ، اعىلشىن ەلىنە بارام دەگەن ارمان جولىندا ىزدەنۋ ۇستىندە.
