تاشكەنت تورىندە ابايدىڭ تۋعان كۇنى تويلانىپ جاتىر

وسكەمەن. قازاقپارات - باۋىرلاس وزبەكستان مەملەكەتىنىڭ استاناسىندا ۇلى ابايدىڭ تۋعان كۇنى تۇڭعىش رەت كەڭ اۋقىمدا تويلانىپ جاتىر.

ايتۋلى شاراعا شىعىس قازاقستان وڭىرىنەن وبلىس اكىمىنىڭ ورىنباسارى اسەم ءنۇسىپوۆا باستاعان ارنايى دەلەگاتسيا قاتىسۋدا، دەپ حابارلايدى قازاقپارات ءتىلشىسى.

وزبەك ەلىندە ابايدى ۇلىقتاۋ، ونىڭ ادەبي مۇراسىن جۇرتقا ناسيحاتتاۋ جۇمىستارى ناۋرىز ايىندا باستالىپ كەتكەن ەكەن. وعان قوس مەملەكەت باسشىلارىنىڭ ءوزارا ىنتىماقتاستىقتى دامىتۋ جونىندەگى كەلىسىمدەرى سەرپىن بەرسە كەرەك. وسى كەلىسىم اياسىندا وزبەكستان پرەزيدەنتى شاۆكات ميرزيەيەۆ ارنايى قاۋلى قابىلداعان. سول قاۋلى نەگىزىندە بيىل وزبەكستان بويىنشا اباي جىلى جاريالانىپتى.

تاشكەنت تورىندەگى سالتاناتتى شارا قازاقستاننىڭ وزبەكستانداعى توتەنشە جانە وكىلەتتى ەلشىسى ەرىك وتەمبايەۆتىڭ، قازاقستان جازۋشىلار وداعىنىڭ ءتوراعاسى ۇلىقبەك ەسداۋلەتوۆتىڭ، وزبەكستان رەسپۋبليكاسىنىڭ ۇلتارالىق قاتىناستار جونىندەگى كوميتەتىنىڭ ءتوراعاسى رۋستام كۋربانوۆتىڭ، شىعىس قازاقستان وبلىسى اكىمىنىڭ ورىنباسارى اسەم ءنۇسىپوۆانىڭ قاتىسۋىمەن ءوتتى.

ۇزىندىعى 3 شاقىرىمعا جەتەقابىل اباي كوشەسىنىڭ باسىندا قاسقايىپ ۇلى ابايدىڭ ەسكەرتكىشى تۇر. ونىڭ ارتىندا توبەسىنە كوك كۇمبەز توڭكەرىلگەن قازاقستان ەلشىلىگىنىڭ ەڭسەلى عيماراتى بار. تاشكەنتتىكتەر ونى وزبەكستانداعى ەڭ ۇلكەن ەلشىلىك عيمارات دەپ سيپاتتادى بىزگە. ەسكەرتكىش الدىنا ەل تاڭعى ساعات 8.00 دەن جينالا باستادى. اراسىندا قازاقشا قاۋقىلداسىپ جاتقان قارتتار دا جەتەرلىك.

اباي تۇلعاسىنا ءتاۋ ەتۋگە كەلگەن قالىڭ قاۋىمعا العاشقى لەبىزدى قازاقستان ەلشىسى ءبىلدىردى.

«بيىل ناۋرىزدا قابىلدانعان وزبەكستان پرەزيدەنتىنىڭ قاۋلىسىندا اباي شىعارماشىلىعى قازاقستانمەن قاتار وزبەك حالقىنىڭ دا رۋحاني دامۋىنا زور ىقپال ەتكەنى اتاپ كورسەتىلگەن. اباي ەسكەرتكىشىنىڭ الدىندا اقىننىڭ تۋعان كۇنى قارساڭىندا ولەڭ وقۋ بۇدان بىلاي داستۇرگە اينالماق»، - دەدى ەرىك وتەمبايەۆ.

التايدان ارنايى بارعان شىعىس قازاقستان دەلەگاتسياسى ۇلى اقىننىڭ تاشكەنتتەگى وقىرماندارىنا ەرەكشە سىيلىق الا بارعان. ول - «اباي الەمى» سەرياسىمەن باسىلىپ جاتقان 100 تومدىق توپتامانىڭ العاشقى بەس كىتابى. اتالمىش تارتۋدى بەلگىلى عالىم اراب ەسپەنبەتوۆ وزبەكستان جازۋشىلار وداعىنىڭ عيماراتىندا وتكەن كونفەرەنتسيادا تابىس ەتتى. ەكى شارادا دا سەمەي قالالىق تاريحي-ولكەتانۋ مۋزەيى مەن وبلىستىق امبەباپ كىتاپحانا قىزمەتكەرلەرى مازمۇندى كورمە ۇسىندى. تاشكەنتتىڭ زيالى قاۋىمىن اسىرەسە ⅩⅨعاسىردىڭ اياعى مەن ⅩⅩعاسىردىڭ باسىندا جارىق كورگەن سيرەك كىتاپتار قىزىقتىردى. ولاردىڭ اراسىندا اباي كوز مايىن تاۋىسىپ وقىعان ەسكى كىتاپتاردى قولعا الىپ، جاقسى ىرىمعا بالاعاندار دا بولدى

«تاشكەنت تورىندەگى تويعا ۇلى ابايدىڭ جەرلەس ۇرپاقتارى رەتىندە قاتىسۋ - ءبىز ءۇشىن ۇلكەن ابىروي. قازاقتىڭ باس اقىنىن وسىلايشا ۇلىقتاپ جاتقان باۋىرلاس مەملەكەتكە بۇكىل شىعىس قازاقستان حالقىنىڭ اتىنان العىس ايتامىن. ۇلى ابايدىڭ مۇراسى ءوزى تۋعان وڭىردە دە كەڭىنەن ناسيحاتتالۋدا. ونىڭ شىعارماسى بۇگىندە الەمنىڭ 28 تىلىنە اۋدارىلدى. قازاقستان پرەزيدەنتى نۇرسۇلتان نازاربايەۆتىڭ نۇسقاۋىمەن قولعا الىنعان «رۋحاني جاڭعىرۋ» باعدارلاماسى دا ۇلى اقىننىڭ مۇراسىن تۇگەندەۋگە كوپ سەپتىگىن تيگىزۋدە. بيىلعى جازدا عانا 2000 نان استام مەكتەپ وقۋشىسى ۇلى اباي تۋعان جيدەباي وڭىرىنە ساياحات جاساپ، اباي الەمىمەن تىنىستاپ قايتتى. ال قازاقستان جازۋشىلار وداعىنىڭ ءتوراعاسى  ۇلىقبەك ەسداۋلەتوۆ تويعا ولەڭنەن شاشۋ شاشتى.

تاشكەنتتەگى قازاق جاستارى اباي مۇراسىنان كەندە ەمەس ەكەندىكتەرىن دالەلدەپ، اقىن ولەڭدەرىن قوس تىلدە جاتقا وقىسا، سەمەيلىك ءداستۇرلى ءانشى بەرىك وماروۆ تاشكەنت اسپانىن اباي اندەرىنە بولەدى.

ەلشىلىك الدىنداعى شارا اقىن ەسكەرتكىشىنە گۇل شوقتارىن قويۋمەن تۇيىندەلدى. ال جازۋشىلار وداعىنىڭ عيماراتىنداعى كونفەرەنسيا ءالى جالعاسۋدا.