استانادا «مەن قازاقپىن» مەگاجوباسىنىڭ ءتۇسىرىلىمى ءجۇرىپ جاتىر

استانا. قازاقپارات - استانادا «مەن قازاقپىن» حالىقارالىق مەگاجوباسىنىڭ ءتۇسىرىلىمى ءجۇرىپ جاتىر، دەپ حابارلايدى قازاقپارات ءتىلشىسى.

«مەن قازاقپىن» حالىقارالىق بايقاۋدىڭ جالپى ىرىكتەۋ كەزەڭى اياقتالىپ، تەلەۆيزيالىق نۇسقاسىنىڭ ءتۇسىرىلىمى باستالدى.

وسىمەن ەكىنشى جىل قاتار وتكىزىلگەن مەگاجوبانىڭ نەگىزگى ماقساتى - قازاقتىڭ ءداستۇرلى ءان ايتۋ، تەرمە، كۇي تارتۋ ونەرىن ناسيحاتتاۋ جانە ءداستۇرلى ونەر جاناشىرلارىنىڭ مارتەبەسىن كوتەرۋ.

بايقاۋدىڭ تاعى ءبىر ەرەكشەلىگى - قاتىسۋشىلار زاماناۋي نەمەسە اۆتورلىق شىعارمالاردى ەمەس، ءداستۇرلى حالىق ءان، كۇي، تەرمەلەرىن ورىندايدى. سول ارقىلى ۇيىمداستىرۋشىلار ۇمىت بولعان ۇلتتىق ونەردى جارىققا شىعارۋدى ماقسات ەتىپ وتىر.

جالپى ىرىكتەۋ كەزەڭىنەن 49 قاتىسۋشى تەلەۆيزيالىق تۇسىرىلىمگە جولداما الدى. ونىڭ ىشىندە موڭعوليادان - 3، رەسەيدەن - 2، جاپونيادان - 1 قاتىسۋشى، قالعانى ءوز ەلىمىزدەن. بۇگىنگى تۇسىرىلىمنەن 32 ۇمىتكەر كەلەسى كەزەڭگە جولداما الادى.

«جوباعا قاتىسۋشىلار مەن قاتىسقىسى كەلەتىن ۇلتتىق ونەردى ۇلىقتاۋشىلاردىڭ سانى جىل ساناپ ارتۋدا. بىلتىر اتالعان جوباعا قاتىسۋعا 700 ءوتىنىش تۇسسە، بيىل 2 مىڭنان اسا ءوتىنىش قابىلداندى. ىرىكتەۋ كەزەڭى بەلگىلى جۇيە بويىنشا اۋىل، اۋدان، وبلىس، ال ودان شىققاندار رەسپۋبليكالىق تەلەۆيزيالىق تۇسىرىلىمگە جولداما الدى. ودان بولەك، حالىقارالىق ىرىكتەۋ بولدى. قاتىسۋشىلاردىڭ سانىمەن قاتار، ساپاسى دا جوعارى دەپ ايتۋعا بولادى. بۇل - ءادىلقازىلاردىڭ ءسوزى»، - دەيدى «مەن قازاقپىن» جوباسىنىڭ اۆتورى جانە باس پروديۋسەرى قۋانىش سۇلەيمەنوۆ.

بايقاۋدا 18 بەن 40 جاس ارالىعىنداعى ءداستۇرلى ءانشى، كۇيشى، تەرمەشىلەر باق سىناۋدا. قازىلار القاسى قۇرامىندا مەملەكەت جانە قوعام قايراتكەرى مىرزاتاي جولداسبەكوۆ باستاعان باسقا دا ونەر مايتالماندارى بار.

«ەسترادالىق ءان ايتۋ ونەرى شارىقتاپ تۇرعان كەزدە ءداستۇرلى انمەن تاڭعالدىرۋ قيىن. ونىڭ ءوزىنىڭ تىڭدارماندارى مەن سىنشىلارى بار. موڭعوليادان ىرىكتەۋ كەزەڭىنە جالپى سانى 50 دەن اسا ۇمىتكەر قاتىستى، سونىڭ ىشىنەن 3 ادام رەسپۋبليكالىق تۇسىرىلىمگە جولداما الدىق. مەن ءداستۇرلى ءان ايتۋ اتالىمى بويىنشا قاتىسىپ جاتىرمىن. بۇگىن سالعارانىڭ «جيىرما بەس» ءانىن ورىندادىم. ءادىلقازىلار جاقسى پىكىردە بولدى، قانداي باعا بەرەتىنىن ۋاقىت كورسەتەدى»، - دەيدى موڭعوليادان كەلگەن قاتىسۋشى قادىحان ماناي ۇلى.

«مەن قازاقپىن» مەگا جوباسىنىڭ فينالى جەلتوقساندا، استانادا بولادى.