امەريكادا قاماۋعا الىنعان قازاقستاندىق قىزداردىڭ بىرىنە قاتىستى جاڭا دەرەك شىقتى

 استانا. قازاقپارات - ا ق ش- تا الاياقتىق جاسادى دەپ ايىپتالعان قازاقستاندىق ءۇش ايەلگە قاتىستى سوت وتىرىسى باستالدى.

الايدا العاشقى تىڭدالىمدا ولارعا قانداي ايىپ تاعىلعانى عانا ايتىلادى. قىزداردىڭ ءىسى بويىنشا كەلەسى تىڭدالىم قازان ايىندا وتەدى دەپ حابارلايدى «ك ت ك» ارناسى.

العاشقى تىڭدالىمدا وتانداستارعا قانداي ايىپ تاعىلعاندىعى عانا ايتىلدى. ال كەلەسى وتىرىس قازان ايىندا وتپەك. تۇتقىندالعانداردىڭ تۋىستارى جات جۇرتتا جازىقتى بولىپ جاتقان كەلىنشەكتىڭ تاعدىرى ءۇشىن الاڭداۋلى. سەبەبى كۇدىكتى ديورانىڭ اناسىمەن دە بايلانىس ۇزىلگەن.

ءۇش بىردەي وتانداسىمىزعا قاتىستى سوت نيۋ-يوركتە ءوتتى. العاشقى سوت الدى تىڭدالىمدا ولاردىڭ قانداي باپپەن ايىپتالىپ جاتقانى ايتىلدى. ال كەلەسى سوت وتىرىسى شامامەن ەكى ايدان كەيىن وتەدى.

وعان دەيىن تەرگەۋشىلەر ۇستالعان 25 ادامنىڭ ءارقايسىسىنىڭ قىلمىستىق ىستە اتقارعان ءرولىن انىقتاۋى ءتيىس.

«وتانداستارىمىز قىلمىستىق جولمەن اقشا جىمقىردى دەپ ايىپتالىپ جاتىر. ولارعا قازاقستاننىڭ نيۋ-يوركتاعى باس كونسۋلدىعى بارىنشا كومەك قولىن سوزۋدا. جاقىندارى جانە ادۆوكاتتارىمەن دە بايلانىستا ءوتىرمىز»، - دەيدى ق ر س ءى م رەسمي وكىلى ايبەك سمادياروۆ.

جات جۇرتتا باسى داۋعا قالعانداردىڭ جاقىندارى ولاردىڭ تاعدىرى ءۇشىن الاڭداۋلى. بىزگە كۇدىكتى ديورا اشيروۆانىڭ جەزدەسىمەن جۇزدەسۋدىڭ ءساتى ءتۇستى. 42 جاستاعى ازاماتتىڭ ايتۋىنشا، تۇتقىنداعى بالدىزىنىڭ 3 بالاسى بار. ۇلكەنى 10، كەنجەسى 3 جاستا. ءوزى امەريكادا ءۇي كۇتۋشىسى بولعان ەكەن.

سوندىقتان يلحوم ماماتوۆ ديورانىڭ جۇرتقا كەسىرىن تيگىزۋى مۇمكىن ەمەس دەيدى.

«بالدىزىما اۋىر ايىپ تاعىلعان. ونىڭ تاعدىرى ءبىزدى بەي-جاي قالدىرمايتىنى انىق. قازىر نە ويلارىمىزدى بىلمەيمىز. ديورانىڭ اناسىمەن دە بايلانىس جوق. بۇرىنعى تەلەفون نومىرلەرىنە دە جاۋاپ بەرمەيدى. بالالاردىڭ جاعدايى نە بولىپ جاتىر، ول دا بەلگىسىز»، - دەيدى ديورا اشيروۆانىڭ جەزدەسى يلحوم ماماتوۆ.

ءبىر قىزىعى قاماۋعا الىنعان ءۇشىنشى ايەل ەلەنا قۇدايبەرگەنوۆا جايلى ازىرگە ەش جەردە اقپار جوق. ءتىپتى ديورانىڭ اكەسى دە، جەزدەسى دە ونى تانىمايمىز دەيدى. سوعان قاراعاندا تۇتقىندالعانداردىڭ ءبىر بىرىنە تۋىس دەگەنى جاڭساق اڭگىمە بولۋى دا عاجاپ ەمەس.

ەسكە سالساق، ا ق ش- تا الاياقتىق جولمەن رەترو-كولىكتەردى ساتتى دەگەن كۇدىكپەن جالپى سانى 25 ادام قاماۋعا الىنعان. كۇدىكتىلەر ت م د قۇرامىنداعى 8 ەلدىڭ ازاماتتارى. ۇشەۋى قازاقستاندىق. ولاردىڭ كىناسى دالەلدەنسە، ا ق ش زاڭى بويىنشا 30 جىلعا دەيىن تۇرمەگە جابىلۋى مۇمكىن.