ەۋروپا ليگاسى: «قايرات» چەح كلۋبىنان جەڭىلىپ قالدى

استانا. قازاقپارات - الماتىنىڭ «قايراتى» بۇگىن فۋتبولدان ەۋروپا ليگاسى ءۇشىنشى ىرىكتەۋ كەزەڭىندەگى العاشقى ويىنىن سىرت الاڭدا وتكىزدى.

چەحيانىڭ ولوموۋتس قالاسىنىڭ «سيگما» كومانداسىمەن كەزدەسىپ، ولاردان 0:2 ەسەبىمەن جەڭىلىپ قالدى، دەپ حابارلايدى قازاقپارات.

اتالمىش ويىنعا «قايرات» فۋتبولشىلارى جاقسى دايىندىقپەن كەلدى. باستى ماقسات - ەۋروپا ليگاسىنىڭ توپتىق كەزەڭىندە سىنعا ءتۇسۋ. «قايراتتىڭ» باس باپكەرى كارلوس الوس فەررەر العاشقى مينۋتتان ۆلاديمير پلوتنيكوۆ، شەلدون باتو، عافۋرجان سۇيىمبايەۆ، سەرگەي پوليتيەۆيچ، باۋىرجان يسلامحان، يساەل باربوزا، اكوش ەلەك، ستانيسلاۆ لۋنين، ادەرينسولا ەسەولا، اندرەي ارشاۆين، جۋان فەليپە سىندى فۋتبولشىلاردى ويىنعا قوستى.

ال «سيگما» ساپىندا ميلوش بۋحتا، ۆاتسلاۆ ەمەلكا، يان شتەربا، ميحال ۆەپرجەك، ياكۋب پلشەك، ۆاتسلاۆ پيلارج، داۆيد گوۋشكا، شيمون فالتا، لۋكاس كالۆاح، مارتين سلادكي، مارتين نەشتور سىندى جىگىتتەر جاسىل الاڭعا شىقتى.

«سيگما» ويىنشىلارى ءوز الاڭىنداعى كەزدەسۋدە كوبىرەك گول سوعۋعا نيەت تانىتتى. سوندىقتان تورەشى ىسقىرىعى ەستىلىسىمەن-اق ولار شابۋىلعا شىقتى. العاشقى بەس مينۋتتىڭ وزىندە ءبىرشاما مارتە ءبىزدىڭ قاقپاشىنى مازالاپ كوردى. وزدەرىنىڭ كوزدەگەن ماقساتتارىنا 21-مينۋتتا جەتتى. «سيگما» ساپىنان مارتين سلادكي ءبىزدىڭ قورعانىس شەبىندەگى قاتەلىكتى شەبەر پايدالانىپ كەتتى. مارتين سلادكيدىڭ تەپكەن دوبى «قايراتتىڭ» قاقپاسىنا ءتۇستى. بۇدان كەيىن دە ولاردىڭ كوپتەگەن شابۋىلدارى ءوربىدى. الماتىلىقتار نەگىزىنەن قورعانىس ماڭىندا جۇرۋگە ءماجبۇر بولدى.

جالپى، «سيگما» نەگىزىنەن جەرگىلىكتى ويىنشىلارعا كوڭىل بولەدى. سەبەبى، ولارعا العاشقى مينۋتتان وزدەرىنىڭ تۇلەكتەرىنە سەنىم ارتتى. كوماندا قۇرامىنداعى جالعىز لەگيونەر بۋدج مانزيانىڭ ءوزى دە قوسالقى قۇرامدا وتىردى. سوعان قاراماستان ولاردىڭ ءاربىر شابۋىلى بىزگە وڭاي سوقپاي جاتتى. ەكىنشى كەزەڭنىڭ 50-مينۋتىندا ۆاتسلاۆ پيلارج ەسەپتى ۇستەمەلەدى.

ال 68-مينۋتتا قوس كوماندانىڭ ويىنشىلار سانى قايتا تەڭەستى. «سيگما» ساپىنان ميحال ۆەپرجەك الاڭنان قۋىلدى. بۇدان كەيىن «قايرات» فۋتبولشىلارى ءبىرشاما شابۋىلعا شىقتى. دەسە دە ولاردىڭ ەشقايسىسى دىتتەگەن ماقساتىنا جەتپەي جاتتى. ويىنىڭ 80-مينۋتىنا باستاپ «قايرات» شابۋىلدى ۇدەتە ءتۇستى. الايدا، ونى «قايرات» جىگىتتەرى ءتيىمدى پايدالانا العان جوق. «سيگما» «قايراتتى» 2:0 ەسەبىمەن جەڭدى. قارىمتا كەزدەسۋ 16- تامىزدا الماتى قالاسىندا وتەدى.

«قايرات» بۇعان دەيىن ءبىرىنشى ىرىكتەۋ كەزەڭىندە اندوررانىڭ «ەنگوردان» كومانداسىن قوس ويىننىڭ قورىتىندىسىمەن 10:1 ەسەبىمەن جەڭسە ودان كەيىن ەكىنشى ىرىكتەۋ كەزەڭىندە گوللانديانىڭ «از الكماار» كلۋبىن ءوز الاڭىندا 2:0 ەسەبىمەن جەڭىپ، سىرت الاڭدا 0:0 ەسەبىمەن تەڭ ءتۇستى.